Tevgera Jinen Êzidî'nin (TAJÊ) bi slogana  ''Yewîye û têkoşîn garantîyê pawitişê cinîyan ê'' bajarekê Til Ezerî yê Şingalî de kombîyayîşê cinîyan organîze kerd. Baxdad, Mûsûl, Kerkuk û Şingalî ra xeylêk endamê dezgehanê komelê sîvîlî û cînîye sîyasetmedarî tewrê kombîyayîşî bîyî.

Kombîyayîşî bi qiseykerdişê Endama Koordînasyonê TAJÊ Rîhame Heco dest pêkerd. Heco serekewtişê QSDyî yê vera çeteyanê DAÎŞî yê fîraz kerd û vat seba ke înan merdimîye qirkerdişî ra xelisnaye ê  înan rê menetdar ê. Hezo vat: ''Ma cinîyê êzidî û iraqijî ameyî têhet ke derheqê sîyasetê qirkerdişî ke vera ma yeno rayraberdene qisey bikerê. Ma zanê ke tarîxî ra cinîyê êzidî û erebî semedê pawitişê bawerî û herra xo tim têkoşîn kerdê. Eke ma cinîyî destê yew bînan tepişê ma eşkenê tarîxê têkoşînê cinîyan binusê. DAÎŞî bi hedefgirewtişê cinîyan waşt komelê êzidîyan bişikno. Wa her kes bizano ke ma cinîyê êzidîyî badê fermanî xopawitiş mûsayî.''

Cinîyan ê bînan zî qiseykerdişê selamkerdişî kerd û dima ra derheqê fermanî de sînevîzyon ame seyrkerdene.  Roniştişê dîyinî yê kombîyayîşî bi qiseykerdişê Samare Mehme ya ke hetê çeteyan ra ameye remnayene dewam kerd ke aye qala hîkayeya xo kerd.

Hemsereka Rayberdişî yê Îdareyê Xoserî yê Şingalî Riheme Hesen badê hîkayeya Samare qisey kerd. Hesene ard ziwan ke DAÎŞî vera cinîyan êzidîyan qirkerdiş kerd û vat seba ke ê vera nê qirkerdişî vejîyê Îdareyo Xoser ê Şingalî nayo ro.

Endama Cehpheyê Têkoşînê Demokratîke yê Mûsûlî Dîlpake Seat zî bale ante muhîmîya têkoşînê hemparî ê cinîyan ê êzidî û ereban ser û vat ê zî sey cinîyan ê ereban kişta cinîyan ê kurdan ê êzidîyan de yê.

Edama Îdareyê Waqfê Cinîyan ê Êzidîyan Ferîde Sadun zî ard ziwan ke înan badê fermanî xo rêxistine kerde ke cinîyê ke destê çeteyan de bixelisine û vat: ''Xeylêk cinîyî hetê QSDyî ra ameyî xelisnayene. Nê cinîyê ke yenê Şingal zafê înan hetê dezgehanê komelê sîvîlî, PDK û dewlete ra yenê remnayene. Bi paştdayîşê madî cinîyan xapînenê ke şahîdîya înan çîn bikerê. Serê kerdişanê DAÎŞî yeno qefilnayene. Hetê bînî ra PDK tim îdîa keno ke o cinîyan ê êzidîyan xelisneno. PDKyî ma rê xîyanet kerd nê semedî ra  bi hezaran cinîyî kewtî destê çeteyan. Coka qiseykeridşê înan bêmana yo.''

Aktîvîsta iraqije Bidore Elcerah zî bale ante polîtîkayanê barkerdişî ser û vat: ''Iraq de sîyaseto xurt esto. No sîyaset cehd keno şaran û bawerîyan cêser bifîno. Wazenê ke ma bikerê dişmenê yewbînan. Amerîka wazena şaranê na herra bimbareke tîya ra vejo û paştgêranê xo tede ca bikero. Ma cinîyî ganî verê nê sîyasetî bigêrê.''

Fermandara YJŞyî Ruheyve Şingalî zî vat înan xo rêxistine kerd û hêzê xo nayî ro ewro ra tepişya cinîyan qirkerdişan ra bipawê.

Cinîyan ê êzidîyan û ereban mesajê çîyê ke ciwîyenê hempare wa têkoşînê înan  zî hempar bo dayî. Cinîyan soz da ke ê do ewro ra tepîya zafêr wayîrê yewbînan bivejîyê.