Ronişteyê Mehlaya Şêxmeqsûdî yê Helebî, gama ke hêrişê grûbanê çeteyan zaf zêde bîbî dejê pîlî antî û ronişteyê mehla mecbûr mendî ke koç bikerê. Dimayo ke mehla bi xoverdayîşî amî azadkerdene şar agêra û sazîyê cimatkîyî yê ke mehla de bî newe ra dest bi fealîyetanê xo kerd. Mehla de cuye, bi serkêşîya sazîyanê sivîlan ê cimatî newe ra organîze bîye.

Dimayo ke cinîyî zî bi hawayêkê aktîfî tewrê xoverdayîşî bîyî seba ke cimat goreyê prensîbanê exlaqî û polîtîkan newe ra bêro vurnayene û cimatî mîyan de îdeolojîya azadîya cinîyan bêro bihêzkerdene, îhtîyacî virazîyaye ke programê sîyasî, kulturkî û cimatkîyî bêrê organîzekerdene. Kongreya Star no gure girewt xo mil û bi awankerdişê akademîyanê perwerdeyî gama ewilêne eşte. Akademîya Kongreya Star, 5’ê Teşrîna Peyêne 2018 de amî awankerdene.

Akademî de heta nika bi tewrbîyayîşê 118 cinîyan 5 programê perwerdeyî yê cîyayî ameyî temamkerdene. Nê programanê perwerdeyî de perwerdeyê rastîya rayberîye, tarîxê cinîyan, rêznameyê Kongreya Star, cinsîyetkarîya cimatkîye, cinî û polîtîka, îdare û organîzekerdiş, tarîxê Sûrîye, tarîxê Kurdistanî, cimato xozayî, jîneolojî, şero taybet, ekonomî û neteweyê demokratîkî ameyî dayene.

Endama Komîteya Perwerdeyî Rojava Silêmane vat ke akademî bi programanê mûsnayîşê akerdeyî dest bi perwerdeyî kerdo û dima ra bi dewreyanê xo yê xusûsîyan înan cinîyê komun û meclîsan zî daxil kerdê.