Çarçeweya operasyonê qirkerdişê sîyasîyî de Amedî de Aklîme Hanas (57) ameye destbendkerdene.

Çarçewa tehqîqatê Serdozgerîya Komare ya Amedî de derheqê 33 kesan de bira destbendkerdişî amebî dayene. Endamê Têgêrayîşê Cinîyan ê Azadan (TJA), endamê sendîka û komeleyan zî tede heta nika 23 cinîyî ameyî destbendkerdene.  Vervatoxa Platformê Rojnamegeran ê Cinîyan ê Mezopotamya û Edîtora Jinnewsî Ayşe Guney, Vervatoxa Têgêrayîşê Cinîyan ê Azadan (TJA) Ayşe Gokkan û Hayrîye Demîra 70 serre zî tede 23 cinîyî pê bahaneya beşdarîya çalakî û aktîvîteyan vatişanê şahîdan ser o ameybî destbendkerdene.

Nînan ra Hayrîye Demîr bado ke vejîyaye mehkeme ameye veradayene.

Akîme Hanasa  ke xeylêk problemê ci yê weşîye estî, a zî çarçeweya eynî tehqîqatî de semedê îfadegirewtişî ameye vengdayene û dima ra ameye destbendkerdene.

 Semedo ke dosyaya nê kesan ser o bira nimitke esta avûkatan û cinîyan rê zanayîş nêno dayene.