Prosesê vîrusê Korona de şîdetê vera cinîyan zêdîya, pê qanûnê înfazî zî kiştoxê cinîyan, îstîsmarkerî ameyî veradayene. Aktîvîsta Têgêrayîşê Cinîyan ê Azadan (TJA) Samîye Demîr derheqê şîdetê vera cinîyan de ANFyî reyde qisey kerd.

Samîye Demîr îfade kerd ke dewlete qanûnê înfazî seba manfaatê xo vet û vat: ''Pê rayanê îqtîdarî û terefgîranê ci bi hezaran sûcdarî sey îstîsmarker, cerg û dizdan vera dîyayî. Bi taybetî veradayîşê tecawuzker, îstîsmarkeranê domanan seba cinîyanê ke maruzê şîdetî bîyê, gefêko pîl o. Prosesê Korona de cinîyê ke tim keye de yê maruzê şîdetî benê û kişîyenê. Cinîyî ganî xo vîrusî ra yan zî faîlanê hîşmendîya serdestîya camêrdan ra bipawê? Cinîyî zaf qerqilîyenê û vanê ke asayîşê ganê înan çin o. Nê kesan rê ke vera cinîyan şîdet kenê ganî hetê mehkemeyan ra asta berze de ceza bêra dayene. La cezaya şenike yena dayene înan û yenê verdayene. No yeno a mana ke nê faîlî pê destê dewlete seba sûckerdişî yenê teşwîqkerdene.''

Samîye Demîr vist vîrî ke tecawuzker û kiştoxê ke pê qanûnê înfazî vera dîyayê, sûckerdişan dewam kenê û vat: ''Rixmo ka şar nêwaştêne no qanûno cîyaker Meclîs de ame qebulkerdene. Netîceyê ci hema zî gan gênê. Ma wazenê ke vengê cinîyan wexto ke ê weş ê bêro eşnawitene û vera şîdetî pêro tedbîrî bêrê girewtene.''

Wendekara Zanîngehê Munzurî Gulîstane Doku 5ê çeleyî ra nata vînbîyaye ya. Samîye Demîr bale ante serebûtê Gulîstane Doku ser û wina qisey kerd: ''Na mesele hema zî Tirkîya de rojdem de nîya. Hetê bînî ra dewlete Zainal Abrakovo ke vînbîyayîşê Gulîstane de rolê ci pîl o, pawena û mesele pey goş kena. Polîsî zî pare kenê ke Gulîstane xo kişta. Dewlete vera şîdetî tedbîrêk nêgêna. Dewlete sûcanê cînsîyan, şîdetê vera cinîyan, tecawuzan û remnayîşan pê polîtîkayanê xo teşwîq kena.''