Têgêrayîşê Cinîyan ê Azadan (TJA), Meclîsê Cinîyan ê Partîya Demokratîke ya Şaran (HDP) û rêxistinê kede û karî  çarçewa  8ê Adare Roja Cinîyan ê Kedkeran a Dinya de  xeyêk bajaran de waran de bî.

Amed de bi tewrbîyayîşê Wekîla HDPyî Semra Guzel qezaya Farqînî de têhetameyîşê cinîyan ame kerdene. Aktîvîte de bale ameye antene muhîmîya xoverdayîşê cinîyan ser û ame vatene ke rixmê heme hêrişê hukmatî yê vera cinîyan, cinîyî do ser bikewê. Reyna qezaya Hênî de têhetameyîşê cinîyan ame organîzekerdene û Sûr de zî semedê tewrbîyayîşê mîtîngê 8ê Adare yê Meydanê Îstasyonî ame vengdayene.

Koordînasyonê Cinîyan ê Ciwanan ê HDPyî  Mêrdîn de bi wesîleya 8ê Adare têhetameyîşê cinîyan ê ciwanan organîze kerd. Vervatoxa HDPyî Ebru Gunay, Vervatoxa Meclîsê Cinîyan ê HDPyî Ayşe Acara Başarane û Wekîla HDPyî Dersime Dag tewrê aktîvîteye bîyî. Gunaye ard ziwan ke ê ciwanan ra tim moral genê û vat: ''M a ewro reyna dî ke şima rêça înan ke vatêne 'ma ciwan dest pêkerd, ma do ciwan ser bikewê' de yê.'' Başarane zî bale ser ke cinîyî hedefê îqtîdarî de yê û vat: ''Gulîstane Doku yew serre ra zafêr o nîna vînayene. Ma zanê ke Kurdîstan de merdimî vînî nêbienê yenê vînîkerdene.'' Dage ard ziwan ke rixmê heme hêrişanê verê cinîyan xoverdayê înan dewam keno û vat: ''Cinîyî qerardarê ke cuya azade ronê.''

Êlih de zî şayîyêke ameye kerdene. Wekîla HDPyî  Feleknase Uca, Hemşaredara Êlihî Songule Korkmaz û Vervatoxa TJA Gulîstane Sonuk tewrê ci bîyî. Aktîvîte de pê deyîranê hunermendanê Merkezê Kulturî yê Baharî govend ameye girewtene. Uca ke tîya qisey kerd ard ziwan ke dewlete seba bin kewta hêrişê cinîyan kena.

Colemêrg de çarçewa xebatanê 8ê Adare de esnafî ameyî zîyaretkerdene. Aktîvîteya ke Wekîla HDPyî ya Riha Ayşe Surucu tewrê ci bîyî de cinîyan rê vilîkî ameyî vilakerdene.

Agirî de zî banê HDPyî de şayîye ameye kerdene. Wekîla HDPyî  Dîlane Dîrayet Taşdemîr zî tewrê ci bîyî . Aktîvîte de derheqê mucadeleyê cinîyan de sînevîzyon ame serykerdene. Taşdemîre vat: ''Qet yew hêz nêeşkeno xoverdayîşê cinîyan bişikno. Heta ke cinîyî azad mebê komel nêeşkeno bibo azad.'' Aktîvîte bi deyîranê Hunermende Nurcan Degîrmencî qedîyaye.

Şirnex de zî cinîyan qorê Hemsereka Meclîsê Şarî yê Cizîre Asya Yuksel zîyaret kerd.Akvîsta TJA Emîne Înana ke zîyaret de qisey kerd vat ê do mucadeleyê Asya bidê domnayene. Cinîyan dima ra zî dewa Roboskî de keyeyê ke 34 domanê înan hetê teyarayanê şerî yê tirkî ra ameyî qetilkerdene zîyaret kerdî.

Dîlok de zî şayîye ameye organîzekerdene. Wekîla HDPyî Tulaye Hatimogullari ke aktîvîte de qisey kerd vat: ''Îqtîdar semedê nimitişê krîzê akonomîkî hêrişê HDPyî keno. Nê krîzî ra zî tewr zaf cinîyî ancenê. Ma do mucadeleyî rê dewam bikerê.''

Reyna Adana û Antalya de zî çarçewa 8ê Adare Roja Cinîyan a Dinya aktîvîteyî ameyî kerdene.