Têgêrayîşê Cinîyan ê Azadan (TJA), Meclîsê Cinîyan ê Partîya Demokratîke ya Şaran (HDP)  û rêxistinê kede û karî  çarçewa  8ê Adare Roja Cinîyan ê Kedkeran a Dinya de  xeyêk bajaran de vejîyayî kuçeyan.

Amed de bi tewrbîyayîşê Hemsereka Pêroyî ya DBPyî Salîha Aydenîz taxa Pirinçlikî ya Peyasî de û bi tewrbîyayîşê Wekîla HDPyî Dersim Dag zî  taxa Kocalanî ya Dîcle de têhetameyîşê cinîyan ameyî kerdene. Atîvîteyan de semedê tewrbîyayîşê mîtîngê 8ê Adare ke do Meydanê Îstasyonî de bêro kerdene ame vengdayene.

Şirnex de zî cinîyan qezaya  Sîlopî de gorê Endama Meclîsê Partîya Herêmanê Demokratîkî (DBP) Sêvê Demîr, Endama Kongreya Cinîya Azade (KJA) Fatma Uyar û Hemsereka Meclîsê Şarî yê Sîlopî Pakîze Nayir yê ke hêrişê qirkerdişî de ameyî qetilkerdene zîyaret kerdî û sozê rêça înan de şîyayîşî da.

Mêrdîn zî cinîyî Parka Sakîne Cansiz a Qoserî de ameyî têhet û waşt ke bi rêzila more fotografê cinîyan ê ke ameyî qetilkerdene ramojnê la polîsan destûr nêda cinîyî parke ra vetî û destna fotografan ser. Reyna qezayanê bînan de zî broşur û vilîkî ameyî vilakerdene.

Qezaya Rêya Armûşî ya Wanî de cinîyan taxa Alîpaşayî de aktîvîteyêke organîze kerde. Wekîla HDPyî Muazzeze Orhana ke tîya qisey kerd bale ante tecrîdê vera Rayberê Şarê Kurdî Abdullah Ocalanî ser û vat: ''Ewro zîndanan de tecrîd vila bîyo. Bi seyan cinîyî zîndanan de raştê cigêrayîş rûtî yenê. Cinîyan ke cigêrayîşo rût teşîr kerd sey 'bênamûse' ameye namekerdene. AKP heme polîtîkayanê xo yê xeletan wazeno pê tecrîdî bido domnayene.''

Reyna Anqara, Adana, Mersin û Antalya û xeylêk bajaranê bînan ê Kurdîstan û Tirkîya  de çarçewa 8ê Adare de aktîvîteyê cîya cîyayî ameyî kerdene û vera camêrd-dewlete mesajê pîlkerdişê xoverdayîşî ameyî dayene.