Platformê Cinîyan ê Dîcle Amedî (DAKP) Parka Hazale de startê aktîvîteyanê 8ê Adere Roja Cinîyan a Dinya da. Cinîyan ke kincê herêmîyî kerdî piray bi tîlîlîyan cayê çalakîye de ameyî têhet. Seba ke pankerta ''Ma vera qirkerdişê vera cinîyan cuye û vera tecrîdî azadîye pawenê'' ameye akerdene  polîsan çekuya ''tecrîd'î' kerd bahane waşt ke verê cinîyan bigero. Cinîyan ard ziwan ke tecrîd esto û bi tîlîlî û çapikan polîsî şermezar kerdî.

Rixmê astenkerdişê polîsan eşkerayîye ameye dayene û bi nameyê DAKPyî Songulcane Şîmşek qisey kerd. Şîmşeke bale ante ser ke wextê AKPyî de qirkerdişê vera cinîyan se ra 400  hezar zêdîyayî û vat: ''Dewlete û hukmê camêrdî verê qirkerdişê cinîyan akeno. Pê qikerdişan wazenê ke têkoşînê cinîyan bişiknê û camêrdan rê bikerê mecbur. Coka sîstem tewr zaf cinîyan ê xovedayoxan hedef geno. Rixmê heme hêrişan wa no bêro zanayene ke cinîyî do çirey meydanan cameverdê. Sey heme îqtîdaranê bînan ê camêrdan do peynîya nê îqtîdarê nêrî zî bêro. Xoverdayîşê cinîyan do peynîya şima bîyaro. Îqtîdar seba ke xovedayîşê cinîyan û şarî ra terseno hêriş keno. Tepiştişê Leyla Guven  Ayşe Gokkan zî netîceya nê tersayîşî yo. Cinîyî nêtersenê û semedê heqanê xo têkoşîn kenê.''

Eşkerayîye bi slogananê ''Îtaat çîn o, xoverdayîş esto'', ''Zextê nêeşkenê verê ma bigerê'', ''Ma hiş nêkenê, nêtersene, îtaat nêkenê'', ''Cinî cuye azadîye'' qedîyeye.

Cinîyan badê eşkerayîye binê ablûqaya polîsan de semtê Ofîsî de cinîyan ê tepişteyan rê kartê paştdayîşî şawitî.