Çarçewa 8ê Adare de serkêşîya TJA û Meclîsê Cinîyan ê HDPyî de xeylêk bajaranê Kurdîstan û Tirkîya de aktîvîteyî ameyî kerdene. Cinîyan bi veng û rengê xo kuçeyî xemilnayî û mesajê serewedaritişî dayî.
SerkêşîyaTêgêrayîşê Cinîyan ê Azadan (TJA) û Meclîsê Cinîyan ê Partîya Demokratîke ya Şaran (HDP) de çarçewa 8ê Adare Roja Cinîyan ê Kedkeran a Dinya de cinîyî xeyêk bajaran de vejîyayî kuçeyan.
Yenîşehîrê Amedî de Platformê Cinîyan ê KESKî bi çalakîyêke bale ante şîdet û qirkerdişê vera cinîyan ser. Aktîvîte de ame vetane ke seba ke dewlete qetilkaran pawena qirkerdişê cinîyan zêdîyenê û ame vengdayene ke cinîyê ke semedê xopawitişî ameyî tepiştene wa bêrê verdayene. Cinîyan dima ra Wezîrîya Xizmetanê Sosyal û Karanê Keyeyî rê faxî şawitî û waşt ke wa Pêkerdişê Îstanbulî bêro caardene û cinîyê ke rîyê xopawitişî ra ameyî tepiştene wa bêrê verdayene. Reyna qezayanê Licê, Erxanî, Peyas, Yenîşehîr û Hezro de zî cinîyê aktîvîteyan de ameyî têhet. Wekîlê HDPyî Semra Guzel û Dersim Dag zî tewrê aktîvîteyan bîyî.
8ê Adarê remza herî xurt a têkoşîna jinan e. Em ê vê têkoşîna ji me re mîratmayî bi serbilindî bigihînin serfiraziyê.
— HDP Kadın (@HDPkadin) March 3, 2021
Bijî têkoşîna me ya birêxistî!
BI BERXWEDANÊ JIN DIMEŞIN AZADIYÊ! pic.twitter.com/5FTWJ85eUk
Riha de zî cinîyêke banê HDPyî yê Pirsûsî de ameyî têhet bi erbaneyan û tîlîlîyan esnafî zîyaret kerdî û cinîyan rê vilîkî vila kerdî. Dima ra zî taxa Elîgorî de şayîye ameye kerdene. Seba ke polîsan def û zûrna qedexe kerdî cinîyan pê erbenayan govend girewt. Şirnex de zî cinîyan qezayanê Basan, Silopî û Hezexî de cinîyan rê vilîkî vila kerdî.
Çaldiranê Wanî de zî têhetameyîşê cinîyan estbi. Wekîla HDPyî Muazzeze Orhan û Hemşaredara Çaldiranî Leyla Atsaka ke mabataya ci ameye xespkerdene tewrê aktîvîteye bîyî. Orhana ke tîya qisey kerd vat:'' Cinîyan ê kurdan vera koletîye bedenê tafîna û serewedarir. Ma zî rêça înan de yê. Ewro reyna dayîkê ma yê extîyarî tepiştî. Seba ke xoverdayîşê ma ra tersenê wina hêriş kenê la ê se kenê wa bikerê ma do mucadeleyî rê dewam bikerê.'' Rêxistina HDPyî ya Qelqelî de zî aktîvîteyêke ameye kerdene.
Adana de zî tepişteyanê cinîyan ê sîyasîyan rê kartî ameyî şawitene. Wekîla HDPyî Tulay Hatimogullari ard ziwan ke cinîyî hem zere de hem zî teber de mucadele kenê. Mersîn de zî çarçewa aktîvîteyanê 8ê Adare de tepişteyanê cinîyan ê sîyasîyan rê kartî ameyî şawitene. Antalya de zî kombîyayîşêk ame kerdene û ame waştene ke cinîyê ke rîtê xopawitişî ra ameyî tepiştene wa bêrê verdayene.
