Xeylê bajaranê Almanya de verê zîyaretkerdişê Serokkomarê tîrkî Tayyîp Erdoganî çalakîyê protestokerdişî dest pêkerdî.

MANNHEIM

Bajarê Mannheimî de kurdistanijî û dostê ci ameyî têhet û zîyaretkerdişê Erdoganî protesto kerd. Çalakîye hetê Meclîsê Cinîyanê Ronahî Berîvane ra organîze bîye. Çalakîye de ame vatene ke no zîyaretkerdişê Erdoganî dirîtîya Almanya ramojneno û silganê ‘Merkel fînanse kena Erdogan bombardûman keno‘ ame eştene.

NURNBERG

Bi eynî waştene Nurnberg de zî mîtîngêk ameye viraştene. Rayberîya Însîyatîfê Aştî yê Kurdî de xeylê kesî ameyî peyser. Rêxistena PARTÎZAN û xeylê rêxistenê bînan zî paştî da ci. Çalakîye de zilm û zordarîya ke hukmatê AKPyî şarê kurdî rê keno dîyayî vîr ê û Almanya ra ame waştene ke wa nêbo şîrikê nê sucî.

STUTTGART

 

Stuttgart de zî çalakvanan xêmêk na ro û bi qiseykerdişan û vilakerdişê broşuran derheqê dîktarorîya Erdoganî de zanayîş da. Çalakvanan ard ziwan ke Almanya zî hetkarê qetilkerdişê kurdan a û waşt ke wa na xeletîye ra agêrê û vera neheqîye de vinderê. Xeylê almanan xêmî zîyaret kerd û paştî da çalakvanan.

FREIBURG

Bajarê Freiburgî de zî vera dîktatorîya Erdoganî de kurdî û dostê ci kuçeyan de bî. Çalakîye hetê Meclîsê Komela Demokratîke ya Kurdanê Freiburgî û Melîcê Cinîyan ya Nuda ra ame organîze kerdene. Endamanê Die Linke, Antîfa, YXK û JXK, Dergehê Kulturî yê Elewîyan yê Freiburgî ya pîya bi seyan kesî tewrê çalakîye bî û paştgerîya Almanya ya Erdoganî rê hêrsê xo ardî ziwan.

BREMEN

Bremen de zî Komela Cinîyan ya Sêvê bi eşkerayîyêka eleqe ante dîktatorîya Erdoganî û hetkarîya Almanya ser. Cinîyan mektuba ke Merkele rê nuşto wende. Cinîyan hukmatê Almanya ra waşt ke wa vera şaran de hetê qetilkaran de mevindero.

DUSSELDORF

Dusseldorf de zî rayberîya Însîyatîfê Cinîyanê Dusseldorfî de, xeylê cînîyî ameyî têhet, zîyaretkerdişê Erdoganî yê Almanya protesto kerd û vatî ke ey Erdoganî Almanya de nêwazenî. Cinîyan pankartê ‘Qetilkar Erdogan ma to tîya de nêwazenê‘ akerd û bi siloganan eleqeyêko gird ant xo ser.

BERLÎN

Paytext Berlîn de zî cinîyanê kurdî bi siloganê ‘Qetilkarê cinîyan Erdogan ti xeyr neameyî‘ çalakîyêk viraşt. Çalakîye hetê Meclîdê Cînîyanê Kurdî yê Dest- Danî, Meclîsê Cinîyanê Êzidîyan yê Binevşî û xeylê rêxistinanê bînan ra pîya ame organîze kerdene.

Çalakvanan ard ziwan ke cayê Erdoganî Berlîn de çay şimitiş nê, Dîvanê Edeletî yê Laheyî de hesab dayîş o.

HANNOVER

Hannover de zî vera dîktatorîya Erdoganî de çalakîyêk ameye viraştene. Çalakvanan polîtîkaya hêrîşkarî ya AKPyî û hetkarîya Almanya protesto kerd. Çalakîye de ame vatene ke rixmê heme qetilkerdiş û zextê îtîfaqê lêşinî kurdan sere nêrona û ewro ra tepîya zî têkoşînê xo gird kenê.

DUISBURG

Duisburg de zî çalakîya ‘Ti xeyr nêameyî Erdogan‘ ame viraştene. Kurdistanij û dostanê ci zîyaretkerdişê Erdoganî yê Alamanya protesto kerd. Çalakîye hetê Meclîsê Cinîyanê Şehîd Asya Yuksele ra ameye organîze kerdene.

Heme çalakîyan de veng dîya şarê kurd û hetanê demokratan û ame waştene ke wa tewrê çalakîyanê merkezî yê 28ê êlule saete 16.00 de Postdamerplatzê Berlînî û 29ê êlule saete 11.00 de Deutzer Werftê Kolnî bibî.