Almanya de nê serranê peyênan de xeylêk cinîyê kurdî hetê camêrdan û merdimanê xo ra ameyî qetilkerdene. Têna menga gulane de d cinîyê kurdî bîyî qurbanê şîdetê camêrdan.

2ê gulane de Alsfeld de cinîya rojawanije Şadîya Ahmed (36) a ke wayîra 3 domanan bîye hetê camêrdê xo yê verênî ra ameye qetilkerdene. Şadîya Ahmed temamîya zewajê xo de tim şîdet dî û ci rê gef ame wendene. Nê zî mojnenê ke eşkera bîyo ke no cînayet do bêro kerdene.

Rojnameyê Yeni Ozgur Politika zî bale ante kronolojîya serebûtanê nê cînayetî ser. Goreyê xebera rojnameyî Şadîya Ahmed serra 2015î de dewa Masoqî ya şaristanê Dirbêsipîyê ra koçê şaristanê Hamburgî yê Almanya kerd. Şadîya rîyê şîdetî ra mêrdeyê xo ver da û 3 domananê xo reyde şaristanê Alsfeldî de hetê waka xo de ca bîya. Waka Şadîya Feyruze Ehmed da zanayene ke Şadîya zaf reyî maruzê şîdetê mêrdeyê xo bîye û verê çimanê her kesî ameye qetilkerdene.

Camêrdo kiştox Abulazîz Îbrahîm (Semîr) teşrîna verêna 2019î de waya Şadîya Amara Jîyandaya ke îşxalê dewleta tirke yê Girê Sipî de şehîd bîya, xo rê kerd bahane û ameyo Alsfeld. Camêrdo kiştox pê mabênçîya keyeyî Şadiya reyde reyna ameyo têhet û Îbrahîmî heta adara 2020î aye reyde ciwîyayo. La semedo ke camêrdê kiştoxî şîdetê vera Şadîye dewam kerd, Şadîya ancî bire daye ke ey vera bida. Şadîya çend reyî polîsan reyde zî qala rewşe pare kerda. Mengêke ra verî derheqê Îbrahîmî de bira dûrvistişî dîyaya.

Îbrahîmo ke şaristanê Nurnbergî de hetê keyeyê xo de ca bîyo ge ge şîyêne Alsfeld. 2ê gulane roja yewşemeyî bêxebere şîyo keyeyê Şadîya û ci rê şîdet kerdo. Gerrayê cîranan ra dima polîsî ameyê û înan Îbrahîm keyeyî ra kerdo dûr. Camêrdo kiştoxo ke dima ke polîsî şîyî ameyo keye, pê çakûç da sereyê Şadîya ro û a bi hawayêkê wehşîyî qetil kerda.

Wexto ke no wehşet qewimîya domanê 6,8 û 10 serreyî keye de bîyî. Camêrdo kiştox wexto ke xîret kerdêne ke domanan biremno hetê polîsî ra ame destbendkerdene. Îbrahîmî îfadeyê xo de pê vatişê ''qederê ci amebi'' xo pawit. Derheqê cînayetî de hetê Serdozgerîya Giessenî ra tehqîqatêk dîya destpêkerdene. Hema nêame eşkerakerdene de serebût de peygoşîya polîsan esta yan ney.