Amed de vizêr bi wesîleya serrgêra şehadetê Jîna Emînî  cinîyan verê Edlîyeya Dîyarbekirî ra hetê Meydanê Şêx Seîdî rayraşîyayîş kerd. Çalakîya ke hetê Platformê Cinîyan ê Dicle Amedî ra (DAKAP) û Torra Têkoşînê Vera Şîdetî ya Amedî ra ameye organîzekerdene xeylêk dezgeh û partîyê sîyasîyî û rêxistinê komelê sîvîlî, wekîlê DEM Partî û xeylêk kesî tewrê ci bîyî.

Cinîyan fotografê Jîna Emînî û Narîne Guran û dovîzê sey  ''Ma Jîne Emînî ra heta Narîne kiştoxan zanê'', kiriştî. Polîsan cinîyî girewtî binê ablûqa. Cinîyan bi tîlîlî û çapikan polîsî protesto kerdî û vat verê cinîyan de verê kiştoxan de barikat ronê. Cinîyan bi silogananê sey “Bijî Berxwedana Jinan”, “Jin, Jiyan, Azadî”, “Camêrd kişeno, dewlete pawena”, “Cinîyan ê xoverdayoxan ê Rojhilatî rê hezar selamî”, “ Hesabê Narîne do bêro persayene” vera polîsan nêrazîbîyyaîş mojna. Naye ser o polîsan mecbûr peyser game eşte.

Cinîyê ke bi çapik û tîlîlîyan resayî Meydanê Şêx Seîdî tîya eşkerayîye daye. Eşkerayîye hetê Vervatoxa DEKAPî Filize Kaydu ra ameye dayene. Kaydu bale ante xoverdayîşê vera kiştişê Jîna Emînî ser û vat: ''Jîna Emînî bîye sembola protestoyan û slogana  “Jin, Jiyan, Azadî” heme dinya ra vila bîye. Ma zanê rejîmê mollayî têna leteyêkê na  tarîtîye yo ke heta Rojhilatê Mîyanênî bîya derge.  Afganîstan de, şerê Îsraîl Hamasî de Tirkîya de cinîyî bi eynî zîhnîyetî yenê qetilkerdene.  Êyê ke wazenê dinya bikerî tarî Rojawan de vera şorişê cinîyan de bin ketî. Ma peyê kiştoxanê Jîna Emînî û  Narîne Guran û domanan û cinîyan ê bînan de yê.  Seba ke kiştoxanê cinîyan ra hesab bêro pesayene ma kuçeyan de yê. Şorişê ma yê cinîyan Îranî ra heta Amedî vila beno. Vengê ‘Jin, Jiyan, Azadî’ yew fekî ra berz beno.''

Reyna Idir, Riha, Şirnex, Wan, Êlih , Îstanbul, Anqara û xeylêk bajaranê bînan ê Kurdîstan û Tirkîya de cinîyî vejîyayî waran kiştişê Jîna Emînî û Narîne Guran protesto kerd û vat ê vera hêrişan seba xoverdayîşî qerardar ê.