Qerarê wedaritişê destpanêdayîşê Hemseraka Partîya Herêmanê Demokratîkan (DBP) Salîha Aydenîz Komîsyonê Amadekarîye yê Meclîsî de amebi qebulkerdene. Amed de cinîyan serkêşîya Platformê Cinîyan ê Amed Dîcle (DAKAP)  de paşdî daye Aydenîze.

Aktîstê TJA, wekîlê HDPyî û xelêk kesî tewrê çalakîye bîyî. Çalakîya ke Parka Bayramogluyî de ameye kerdene de eşkerayîye hetê Endama Meclîsê Cinîyan DBPyî Ayhane Akgul ra ameye wendene.

Akgule vist vîrî ke Salîha Aydenîz seba ke 12ê hazîrane de rayraşîyayîşê Gemlîkî de polîsanê ke hêrişê şarî kerd, vera înan vejîyaye meclîs de sey hedefî ameyî mojnayene û vat: ''Wazenê ke verê sîyasetê demokratîkî bigêrê, destkewteyanê kurdan destê înan ra bîgêrê û têkoşînî bişiknê. Coka şexsê cinîyan de hêrişanê xo zêdînenê. Ma do vera her qeyde zextan têkoşîn bikerê. Wa no bêro zanayene heta ke no têkoşîn dewam bikero Salîha Aydenîz  îradeyê Amed û heme cinîyan ê kurdan a û do tim wina bimano.''