Amed de HDPyî çarçewa ''Kampanyaya Keyeyê Wayûbirayî'' de 10 hezar keyeyan reyde têkilîye naye ro û seba 800 keyeyan zî keyeyê wayûbirayî dîyî. Hemsereka HDPyî ya Amedî Hulya Alokmen Uyanik seba paştdayîşê kampanya veng da.
Kampanyaya Keyeyê Wayûbirayî ya HDPyî dewam kena. HDP heta nika Amed de 10 hezar keyeyan reyde têkilîye naye ro, 4 hezar keyeyan rê hetkarîya werdî ameye dayene û seba 800 keyeyan zî keyeyê wayûbirayî dîyî.
Hemsereka HDPyî ya Amedî Hulya Alokmen Uyanik derheqê kampanya de qisey kerd û vat: ''Ma prosesê Korona de na kampanya daye destpêkerdene. Îqtîdar berpirsîyarîya xo nêano ca. Şar HDPyî ra zaf çîyan paweno. Qaşo dewlete pere bida merdiman la merdiman ra pere arê dana. Ma prosesê kampanya de keyeyan reyde têkilîyêka manewî zî naye ro. Ma kerd ke merdimî xo têna hîs nêkerê û paştî bidê yewbînan. Ma seba kampanya bernameyêkê 3 mengan amade kerd. Qaşo komel beno normalîze la hema zî jan dewam keno. Şarî reyde têkilîya ma do dewam bikera. Ganî no normalîzebîyayîş çew rehet nêkero, ganî şarê ma reyna goreyê tedbîran têbigêro.
Îqtîdar seba ke verê muxalîfan bigêro tedaya girane keno. Ma do têkoşînê xo yê vera tayînkerdişê qeyûman, şîdetê vera cinîyan û bêhuqûqî dewam bikerê. Kesê ke wazenê tewrê Kampanyaya Keyeyê Wayûbirayî bibê muracatê rêxistinanê qeza û şaristanan ê HDPyî bikerê. Ma eşkenê pê paştdayîşî heqê nê prosesî ra bêrê.''
