Rayberîya Têgêrayîşê Cinîyan ê Azadan (TJA) de rêxistenanê cinîyan Amed de vera şîdetê serê cinîyan çalakîyêke organîze kerde. Çalakîya Çemberê Morî ke Yenîşehîr de ameye viraştene mabênê polîsan û cinîyanê  wekîlê HDPyî zî mîyan de bî pêrodayîş vejîya.

Çalakîye de hetê cinîyan ra rêzila merdimî/e ameye raardene û kuçeyî bi slogananê cinîyan zimayî. Polîsan waşt ke cinîyî vengê xo bibirnê la rixmê mudaxaleyê polîsan cinîyan peyser game nêşete û bi sloganan vera şîdetî qîrayî û aqibetê Gulîstane Doku persayî.

Adalete Kaya ke bi nameyê Komeleya Cinîyan a Rosa qisey kerd ard ziwan ke prosesê Korona ne de cinîyî qerqilîyenê ke jan yan zî şîdetê camêrdan hîna zaf bimorno û vat: '' Neteweyê Yewbîyayeyî de vera şîdetî planê stretejîkê lezabezê ke do vernîya şîdetî bîgêrê benê hazir la Tirkîya de qet qala ci nîna kerdene.''

Vervatoxa TJA Ayşe Gokan zî bale ante zêdbîyayîşê şîdetê vera cinî, doman û ciwanan ser û vat: ''No sucê merdimîye û eybê îqtîdarî yo. Nêwazenê ke ma aqibetê Gulîstane bipersê. Zîndanan ra heme çeteyê suçî veradayî û êyê ke azadîye û haştî wazenê veranêdayî. Ma cinîyî çirey milê xo çewt nêkenê. Kamera, tanq û topê şima şahîdê ke ma çirey peyser game nêeşte û do meerzê.''