Vîrusê Korona Tirkîya de 11ê adare ra nata tesîrê xo mojneno. 11ê adare ra heta 31ê adare mabênê 20 rojan de 21 cinîyî ameyî qetilkerdene. Nê cinîyan ra 18 tenî keyeyê xo de, 9 tenî hetê mêrdeyê xo ra, 5 tenî zî hetê embazanê xo yê camêrdan ra ameyî qetilkerdene. Rîxmo ke şîdetê vera cinîyan hende zêdîyeno muracatê seba keyeyanê bextwaştişê cinîyan ameyî vindartene. 

Keyeyê bextwaştişê cinîyan ê ke pabesteyê Şaredarîya Amedî ya ke ci rê qeyûm ame tayînkerdene û şaredarîyanê qezayanê Amedî yê, bi bahaneya vîrusê Korona û kêmasîya personelan muracatê seba keyeyan vindarnayî.

Keyeyê Cinîyan ê Kardelenî yê Şaredarîya Baglarî û Merkezê Caardişî û Cigêrayîşê Meseleyanê Cinîyan ê Şaredarîya Amedî (DÎKASUM) semedê qîmnêkerdişê kapasîte ra muracatan erşawena Merkezê Teqîb û Vergirewtişê Şîdetî (ŞONÎM).

ŞONÎM zî muracatê şexsîyî qebul nêkeno û nê kesan erşaweno asayîş. ŞONÎMî da zanayene ke ê muracatê cinîyanê ke weşîya ganê înan binê tehlukeyî de ya qebul kenê la muracatanê bi waştişê ''mendişî'' qebul nêkenê.