Amed de vera qetilkerdişê cinîyan zîncîra merdiman

Amed de cinîyê ke rayberîya DAKAPî de ameyî têhet vera qetilkerdişê cinîyan zîncîra merdiman kerde.

Amed de cinîyî seba ke bale biancê qetilkerdişê Merve Demîrkola ke hetê camêrdêkî ra ameye kiştene û qetilkerdişê cinîyan ê bînan taxa Ofîsî ya Yenîşehîrî de ameyî pêser û înan zîncîra merdiman viraşte. Çalakîye de ke rayberîya Platformê Cinîyan ê Amedî yê Dîcle (DAKAP) de ameye kerdene cinîyan bi dovîzan bale ante qetilkerdişê cinîyan ser.

Wekîla HDPyî ya Amedî Remzîye Tosun, îdarekarê HDPyî yê Amedî û qezayan, Mayê Haştîye, endamê Partîya Sosyalîste ya Bindestan (ESP), zaf cinîyî û domanî tewrê çalakîye bîyî. Polîsan dormeyê meydanê çalakîye girewt.

Cinîyan dovîzê bi nuşteyê ''Ma wazenê biciwîyê'', ''Gulîstan Doku ça de ya?'', ''Semedê qetilkerdişê cinîyan nêbeno'', ''Ti do têna nêşora'', ''Camêrd ney, cuya azade'' daliqnayî milanê xo û destê yewbînan tepiştî zîncîra merdiman viraşte.

Endama Heyetê Îdareyî ya Komeleya Cinîyan a Rosa Ayla Akat îfade kerd ke cinîyî seba ke na zîncîre biba hêvîya cuye ameyî pêser.

Akate vat: "Waştî, camêrd, birayê cinîyan benê kiştoxê înan. Dima camêrdî benê 'çêr'. Ma tîya de dest bi dest ê, ma parçeyê na zîncîre yê. Kesêk nêeşkeno semedêkî ra cinîyan qetil bikero. Ma seba Merve, Muzeyyene û Melîke tîya de yê. Ma do nê fikranê xo vera pêro gefan zî bipawê."

Çalakîye bi sloganan û zilgitan qedîyaye.