Komalanê Cinîyan ê Kurdistanî (KJK) bi şîyarê “Ma tecrîdî bişiknê, faşîzmî birijnê û Kurdistanî azad bikerê” dest bi prosesêkê neweyî yê mucadeleyî kerd. Endama Koordînasyonê KJK’yî Zêrîn Rûkene no proses ercna û îşaretê xoverdayîşê grevanê vêşanîye kerd.

Rûkene destpêkê qiseykerdişê xo de bale ante serê serrgêra 21’ine ya komploya mîyanneteweyîye û vat ke bi komploye înan waşt ke vernîya cigêrayîşê azadîye bigîrê ke Rojakewtena Mîyanêne de bica mebo. Rûkene vat, “Labelê Rayber Apoyî Îmrali de pêgirewtişê xo yê bi azadîye hîna kerd xurt. Nika zî seba ke vernîya nê bigîrê kenê ke bi temamî vengê Rayber Apoyî bibirnê. Bi kilmekî tecrîdî seba nê bica anê. AKP-MHP seba ke qesas Kurdan ra bigîro heme hetan ra hêrişê Rayber Apoyî kenê û seba ke Rayber Apoyî ra zî qesas bigîrê hêrişê Kurd û cinîyan kenê.”  

 ‘TARÎXÊ XOVERDAYÎŞÎ DE MA BÎYÊ GAMA AZADÎYE’

Zêrîn Rûkene vat, “Seba mesuldarîya tarîxîye, bingeyê azadîya fîzîkkîye ya Rayber Apoyî ser o îhtîyacî bi mucadeleyêkê xurtî esta. Xoverdayîşê hemleya azadîye bi mesuldarîya tarîxîye do dewleta Tirkî ra hesab biperso. Wextêkê winayênî de ma dî ke metodê ma ganî bibê metodê serkewtişê pîlî. Naye ra ma îhtîyacî bi seferberîye dîye. Ma zî mîyanê nê tarîxê xoverdayîşî de bîyê gamêka azadîye û ma mucadele danê.”

FAŞÎZM ZOR DE MENDO, CINÎYÎ DO BI SER BIKEWÊ

Endama Koordînasyonê KJK’yî Zêrîn Rûkene ard ziwan ke xoverdayîşê grevê vêşanîye yo ke bi serkêşîya Leyla Guvene dest pêkerd û zîndanan û her cayî de vila bi, bîyo malê şarî.

Rûkene bale ante serê çalakîyanê Leyla Guvene, tepişteyanê PKK û PAJK’î û yê şarî û vat “Do bi tewrbîyayîşanê neweyan nê çalakîyî hîna bibê xurt. Heman wextî de xeylî aktîvîst, akademîsyen, hunermend, nûştox, rojnamegêr, huqûqnas û sîyasetkaranê namdaran eşkera kerd ke ê paştî danê çalakîya Leyla Guvene.

AKP-MHP derbe weno, tay mendo ke birijîyê. Kurdî seba ke estbîyayîşê xo bipawê, bi hawayêkê azadî, bi îrade û bi anorî biciwîyê hemverê qirkerdişî de xover danê. Şaro Kurd bi ziwan, kultur, ekonomî û sîstemê xo yê xoserî şarêko xeylî kan û esîl ê Rojakewtena Mîyanêne yo. Nay era rejimê AKP-MHP’yî goreyê zerrîya xo nêeşkeno serdestîya merkezîye awan bikero. Yanî ma bîyê belayê serreyê modernîteya kapîtalîste.”

FAŞÎZMÎ DERBE WERD

Rûkene vat, “Şarê Kurdî û cinîyî yê Kurdî hêzo tewr organîzebîyaye yê Rojakewtena Mîyanêne yê. Faşîzmî derbe werd. Organîzebîyayîş û serkewtişê xoverdayîşî yê şarî do her çî bewlî bikero. Hemleya Rayberîya ya KJK’yî tena çalakîyan ra nêno pê. Hemleya tewr pîle şerê şarî yo şorişgêr o ke cinîyî serkêşîya ci bikerê, her perçe de sîstemê ma yê cinîyan bi xurtî awan bikerê. Ameyoxo azad ê Rojakewtena Mîyanêne cuya azade ya Rayber Apoyî rê girêdaye yo.”

Rûkene peynîya qiseykerdişê xo de nê vatî: “Weçînitişê cayîyî seba zihîfkerdişê îqtîdarê AKP-MHP’yî yê faşîstî xeylî muhîm o. Vakûrê Kurdistanî seba Rayber Apoyî tim prosesanê cîyayan de rol kay kerdo. Hemleya ma do tesîrêkê pîlî weçînitişan ser o zî bikero. Lazim o ke şarê ma seba şikitişê tecrîdî şiro serê sindoqan û reya xo bido. Ganî weçînitiş de serkewtiş bêro esasgirewtene.”