Sekretera Cinîyan a KESKî Gulîstane Atasoy pare kerd ke malîyetê janî kedkaran rê yeno birnayene û no zî yeno manaya bêkarîyêka zêdêre, butçeyêka kême û xizanêyêka zêdêre.

Sekretera Cinîyan a KESKî Gulîstane Atasoy ANFyî reyde derheqê rewşa kedkaran û karkeran de qisey kerd. Gulîstane Atasoy vat: ''Tedbîrê ekonomîkî yê ameyî eşkerakerdene sey her wextî sermaye pawenê. Kedkarî reyna binê xizanîye de yê. Îqtîdar xîret keno ke nê prosesê janî ra fade bigêro. Nê prosesî de zaf kedkarî pabeyê hetkarîya dewlete bîyî la dewlete înan rê ÎBANê xo seba hetkarîye erşawit. Tercîhê ekonomîkî yê îqtîdarî mojnenê ke wextê zehmetî verê karker û şarî de yê. Îqtîdar xîret keno ke malîyetê nê janî kedkaran û şarî ra bigêro. no zî yeno manaya bêkarîyêka zêdêre, butçeyêka kême û xizanêyêka zêdêre.''

Gulîstane Atasoy da zanayene ke  nê prosesî tewr zaf cinîyan rê tesîr kerd û nê tesîrî di hetan ra eşkera kerdî.

-Seba ke cayanê ke tede jan tewr zaf dîyeno cinîyî tede yê, janî tewr zaf cinîyan ra tesîr kerd.

-Prosesê karantîna de karê keyeyî û mesuldarîya cinîyan zêdîyayî, rêjê şîdetî yê vera cinîyan zî bi nê hawayî zêdîya.

Gulîstane Atasoy bi wesîleya 1ê Gulane Roja Karkeran waştîşê xo yê seba azadîye û têdûştîye ard ziwan. Gulîstane Atasoy vat: ''Eke mudaxeleyo komelkî yo ke xoza, merdim, kede û zanistî reyde têkilîyêka raştikêne nano ro nêbo no sîstem do dewam bikero. Kapîtalîzm û netewe-dewlete bêçare mendî. Rewşêka winasêne de ganî ma 1ê Gulane seba awankerdişê cuyêka newîye, azade, têdûşte û demokratîke bikerê bingeyê pîlkerdişê hêvî.''