Çarçiwaya operasyonanê ke 9ê Teşrîna verêne de hemberê sîyasetkaran de ameyî kerdene nizdê 200 adresan ser o serdeeştiş virazîya, netîceyê ci de 151 kesanê ke derheqê înan de qerarê tepiştişî estbi înan ra 127 kesî gîrîyayî binê nezaretî.

23 tenê ke îfadeyê înan Mudurîya Asayîşî yê Şaristanî yê Amedî de roja ewilêne gîrîyabi serbest ameyî veradayene. Roja pancşemeyî 24 kesanê ke sewqê adlîye ameyî kerdene înan ra 11 tenî bi şertê kontrolî yê edlîyî serbest ameyî veradayene, la 13 kesê ke mîyanê înan de rojnamegere Kîbrîye Evrene zî estbî ameyî tepiştene. Hetê bînî ra 20 kesê ke sewqê adlîye ameybî kerdene, ke înan ra 3 rojnamegerî bîyî, bi şertê kontrolî yê edlîyî serbest ameyî veradayene, 2 kesî zî îfadegirewtişê dozgerîye ra dima sebest ameyî verdayane.   

‘ÎQTÎDAR ÎRADEYÊ CÊNÎYAN RA TERSA‘

Vervatoxa Platformê Rojnamegeran ê Cênîyan a Mezopotamya Ayşe Guneya ke derheqê operasyonanê ke hemverê medyaya Kurdan de ameyî kerdene ANFyî rê qisey kerd, bale ante ke zafaneyê kesê ke gîrîyayê binê nezaretî cênî yê. Ayşe vat ke „Binçimgîrewtişî, ramojnenê ke îqtîdar bi taybetî zî îrade û qerardarîya cênîyan ê weçînitişê pêroyî yê 2015î ra tersayo.“     

Ayşe heman wext vat ke „îqtîdarî bi viraştişê nê operasyonanê sîyasîyan ramoto ke çiqa îradeyê cênîyan ra tersayo“ û bi vîrardişê weçînitişê pêroyî yê 2015î qiseykerdişê xo wina domna: „Têgeyrayîş û qerardarîya cênîyan ê wextê weçînitişê pêroyî yê 2015î û prosesê dimayê ci û bi taybetî zî wextêk ke ame waştene her kes bi OHALî bêro bêvengekerdene cênîyan meydanan de mucadeleyê xo ra tawîz nêda û îqtîdar nê ra tersa. Îqtîdaro ke wazeno nê îrade û mucadeleyê bihêzî yê cênîyan bişikno bi viraştişê operasyonanê sîyasîyan wazeno bireso nê meqsedê xo.“       

SEREŞTIŞÊ KE VERÊ WEÇÎNITIŞÊ HERÊMÎYÎ VIRAZÊNÊ

Ayşe ard ziwan nê operasyonê ke tede xeylî rojnamegerî gîrîyayî binê nezaretî viraştişê înan ê verê weçînitişê herêmeyî tesaduf nêyo û îqtîdar bi nê operasyonan wazeno ke weçînitişê herêmeyî bikero rewêr.

Ayşe dîyar kerd ke operasyonê sîyasîyî temsîlê nizdbiyayîşê AKPyî yê hemverê Kurdan ê û vat „Nê binçimgirewtişî halê tazahurî yê nizdbiyayîşê îqtîdarê 16 serrî yê AKPyî yê hemverê Kurdan ê. Amaco bingeyên Kurdan pelexnayîş, tasfîye kerdiş û eke mumkun bo înan qirkerdiş o.“ 

 ‘MA DO NÛŞTIŞÊ RAŞTÎYAN RA ÇIREY FEK VERA NÊDÊ’

Ayşe dîyar kerd ke AKP wazeno çapemenî de yewserdestî virazo, çapemenîya azade ke bi tewrê xo yê netî hemverê nê polîtîkayanê yewserdestî de tawîz nêdana hetê îqtîdarî ra amîya hedefgirewtene.       

Ayşe vat „Çapemenîya azade amîya hedefgirewtene çunke çapemenî hetê îqtîdarî ra bi temamî kewta halêk ke yew destî ra yena nûştene û xêzkerdene. Hemverê nê çimeyanê çapemenîya ke tede yewserdestî amîya viraştene çapemenîya azade ke qe tawîz nêdana bi destê îqtîdarî yena hedefgirewtene. 

Ayşe ard ziwan ke ganî îqtîdar fek operasyonanê ke hemverê medyaya Kurdan de keno ra tavilî vera bido û wina dewam kerd “Binçimgirewtişî nêheq ê. Embazê ma yê ke xebatkarê çapemenîya azade yê ganî tavilî bêrê veradayene.”

Guneye qiseykerdişê xo bi vatişê „Sey peyrewê tradîsyonê çapemenîya azade ma do cigeyrayîşê heqîqetî ra çirey fek vera nêdê û nûştişê raştîyan bidomnê.”