Amed, Dêrsim, Çewlîg û heme bajaranê bînan ê Kurdîstanî de cinîyî bi wesîleya 8ê Adare Roja Cinîyan ê Kedkaran a Dinya vejîyayî kuçeyan. Cinîyê ke zîhnîyetê camêrd-dewlete protesto kenê mesajê pîlkerdişê têkoşînî danê.

Amed de bi şîarê ''Dem Demê Azadîye yo'' Meydanê Îstasyonî de mîtîng yeno kerdene. Her hetê bajarî ra cinîyan bi slogan û tîlîlîyayan verê xo da cayê çalakîye. Warê mîtîngî de bînayanê berzan de tîmê taybetî ameyî cakerdene.  Heme rayîrê ke şinê cayê mîtîngî de bi seyan polîsî û xeylêk wesayîtê zirxinî ameyî cakerdene. Cinîyî badê di hîrê nuqtayanê eşkenê dewbikewê warê mîtîngî.

Dêrsim de cinîyî Kuçeyê Sanatî de ameyî têhet û heta Meydanê Seyîd Rizayî pê sloganan û pankartan rayra şîyî. Cinîyan tîya pê def û zûrnayî dest pê govende kerd. Çewlîg de zî cinîyê ke banê HDPyî de ameyî têhet dest pê govende kerd. Cinîyî do rayraşîyayêk bikerê, eşkerayîye bide û dima ra panêlêk virazî.

Reyna Wan, Şirnex, Colemêrg, Mêrdîn, Êlih û bajaranê bînan Kurdîstanî û qezayanê ci de çalakîyê ke serkeşîya Meclîsê Cinîyan ê HDPyî û TJA de ameyî organîzekerdene de cinîyî ameyî têhet. Cinîyanê ke  bi kincanê xo yê tradîsyonkîyan kuçeyî xemilnayî bi tilîlî û slogananê xo yê têkoşînî erd zû asmênî zimnenê.