Başarane: Îtîfaqê Kede û Azadîye do prosesî dîyar bikero
Vervatoxa Meclîsê Cinîyan ê HDPyî Ayşe Acar Başaran vat: ''Proses serkêşîya HDPyî de, hetê Îtîfaqê Kede û Azadîye ra do bêro dîyarkerdene.''
Vervatoxa Meclîsê Cinîyan ê HDPyî Ayşe Acar Başaran merkezê partîya xo de derheqê rojdemî de, kombîyayîşê çapemenîye de tay ercnayîşî kerdî.
Qiseykerdişanê Başarane ra tay qismê girîngî wina yê:
''Dadîya Mîr Perwero ke 23yê kanûne de Paris de amebi qetilkerdene, dadîya ci dejê ey ra dinyaya xo bedilnaye. Na şerme û gune hînî tarîxê Tirkîya de cagênê.
Afganîstan de wekîla verêne Mursele Nebîzade ameye qetilkerdene. Afganîstan û Îran de têkoşînê cinîyan rixmê hêriş û tedayan dewam kenê. Ma zî vera rejîmê Molayan ê Îranî û vera rejîmê Talîbanî û vera rejîmê AKP-MHPyî tim têkoşînî rê do dewam bikerê. Tirkîya de 2022 de 334 cinîyan ra 209ê ci zereyê keyeyê xo de ameyî qetilkerdene. Îqtîdarê AKP-MHPyî bi polîtîkayanê xo dişmenîya cinîyan keno. Bi taybetî ma wargehanê KYKyan de nê polîtîkayan vînenê. Cinîyê ciwanî vera nê kerdişan 8ê Adare de zî, 25ê Teşrîna Peyêne de zî tim vengê xo do berz bikerê.
Ma rayaumûmîye rê eşkera kerdbî ke do tewrê pêvînayîş û amadekarîyanê raştkerdişê Qanûnê Bingeyî nêbê. Ma do mîyanê karanê AKP-MHPyî de camegêrê. Çunke no îqtîdar teyna seba ke weçînayîş de nefretî bizêdîno hêrişê cinîyan keno. No îqtîdaro ke her roje qanûnê bingeyî gêno binê payan xo, ma do tede qanûnan nêvirazê.
Welat de her ke bêkarîye û xizanîye zêdîyenê şîdetê vera cinîyan zî zêdîyenê. Reyna îqtîdar tim hêrişê cinîyan û kurdan keno. Hewteyê vîyarteyî de ma dî ke kiştoxê Kemal Kurkutî ame veradayene û ceza nêdîyaye ci.
Tecrîdê Îmraliyî pêro zîndanan rê vila bîyo. Şar Abdullah Ocalanî ra xeberêke nêgêno û weşîya ey ra qerqilîyeno. Nê rojan de di kesanê bi nameyê Veysî Ateşî û Mehmet Akarî vera tecrîdî bedenê xo da adirî ver û dinyaya xo bedilnaye. Ma çalakîyanê winayênan qetî tesdîq nêkenê. La seba ke verê nînan bêro girewtene ganî tecrîdê vera Birêz Ocalanî cade bêro wedaritene.''
Prosesê weçînayîşî serkêşîya HDPyî hetê Îtîfaqê Kede û Azadîye ra bêro dîyarkerdene. Ma do namzetê/a xo vejê. Ma do Meclîs de vengê xo berz bikerê, temsîlîya cinîyan bizêdînê. Coka ma venga cinîyan danê ke dormeyê HDP û Îtîfaqê Kede û Azadîye de bêrê pêser.''
