Vervatoxa Meclîsê Cinîyan ê HDPyî Ayşe Acar Başaran derheqê hêrişanê vera goristanan de ke wextê peyênî de zêdîyayî Amed de eşkerayîyêka çapemenîye daye. Wekîlê cinîyî yê HDPyî û endamê Meclîsê Cinîyan zî eşkerayîye de amade bîyî.

Qiseykerdişê Başarane ra beşêk wina yo:

''Îqtîdarê AKPyî şerê vera kurdan pê rutkerdişê cenazaya Ekîne Vana ke Mûş de wefat kerd, da destpêkerdene. AKPyî şerê hêrişê vera cenazayan da destpêkerdene Şerê vera goristanan da destpêkerdene. Goristanê Xerzanî yê Bedlîsî ra cenazayî renmayî û berdî Dezgehê Tipê Edlî yê Îstanbulî. Nika zî pê na cenazayan keyeyan rê îşkence keno. Hema 267 cenazayî keyeyanê ci rê nêameyî teslîmkerdene. Îqtîdar destûr nêdano ke keyeyî cenazaya xo defin bikerê, nimajê ci bikerê. Îqtîdar hêrişê goran keno û kerrayê goran şikneno. Serra 2015î ra heta ewro vera erjanê kurdan, rûmetê kurdan dest yeno dayene. Nê hêrişê bêexlaq ê.  Ê wazenê ke tarîxê kurdan, estbîyayîşê kurdan, nasnameyê kurdan  pê rayîrê hêrişê vera goran çin bikerê. Wazenê seke Şêx Seîd, Seyîd Rizayî rê kerdo, tarîxê kurdan çin bikerê.

Ganî vera nê hêrişan ma yewîya xo berz bikerê. Sey DAÎŞ no îqtîdar hêrişê goran keno. Nê her di kome zî estbîyayîşê xo parçekerdişê kurdan ser o nanê ro. Coka ma sey şarê kurdî wayîrê erj, tarîx û rûmetê xo bivejîyê. Ganî ma wayîrê estbîyayîş û nameyê nê kesan bivejîyê ke seba ameyoxê şarê kurdî xo ver da. Naye ra sere de cinîyanê kurdan ma venga şarê kurdî danê ke tewirê xo bimojnê û nê hêrişî pûç bikerê. Ma bibê vengê a dayîka ke serê gorê kênaya xo de vera hêrişî nobete gêna. Ma paştî bidê na dayîke. Çend rojan ra dima Roja Dadîyan a. La a roje nê dadîyî eke goran de nobete bigêrê no seba ma do şerm bibo. Ma wayîrê dadîyanê xo bivejîyê. 

Ma serranê 90an de dî ke goş û sereyê cenayan ameyêne cêrakerdene. La no nimitkî ameyêne kerdene. Çend rojî verê cû Wezîrê Karanê Zereyî Suleyman Soyluyî vat: 'Wa parçe parçe bikerê û medyaya komelkîye de vila bikerê.' No tewir nîşaneya prosesê nikayînî ya. Êyê ke 90an de no zulm kerdêne Mehkemeya Heqanê Merdiman a Ewropa de, Mehkemeyanê Mîyanneteweyîyan  de ameyî hukmkerdene, cezakerdene. La ewro AKP naye bi hawayêkê normalî û eşkerayî keno. Wazeno ke komel naye qebul bikero. Na meseleya gor û goristanan meseleya pêro komelî ya. Ma nika mengêka fîraze de yê. Ma Dîyanetî rê persenî dîn de cenazayan rê îşkence esto? Astengkerdişê şînî esto? Şiknayîşê kerraya goran esto? Ma venga ê kesanê ke wayîrê wijdan û bawerî yê danê ke ma vera nê hêrişanê AKPyî vengê xo berz bikerê, ma vengê dadîyanê ke goran de nobete gênê berz bikerê. 

AKP nê prosesî de Mûş, Wan û Çewlîg de hêrişê goran keno û bi nê hawayî wazeno ke îqtîdarê ci dewam bikero. Sîyaseto ke wazeno cinîyan serranê qijkekan de keye de hepis bikero, înan rê tacîz û tecawuzan rewa keno. AKP wazeno pê nê qanûnê înfazî her çi rewa bikero. Ma pêro cinîyê ke têkoşînê vera şerî, têkoşînê demokratîk û azadîya cinîyan kenê pîya vengê xo bikerê yew û vera na polîtîkayan bivejîyê.''