Varvatoxa Meclîsê Cinîyan ê HDPyî Ayşe Acar Başaran hêrişê vera destkewteyanê cinîyan û operasyonê vera dezgehanê cinîyan ê HDPyî ANFyî reyde ercnayî.

Başarane vat: ''Şîdetê vera cinîyan zêdîyeno. Serdestîya camêrdan resa a aste ke medimî hînî eşkeno aye sey qirkerdişê cinsîyî pênase bikerê. Bi taybetî dewirê AKP-MHPyî de her roje hêrişê cinîyan yeno kerdene. No aslê xo de nêzdîbîyayîşê vera meseleya kurdan zî mojneno. Tirkîya de vera pêro dezgehan hêriş esto, hêrişê vera KCDyî zî nînan ra yew o. Xîret yeno kerdene ke dezgehê kurdan bêrê krîmînalîzekerdene.

Hêrişê vera KCDyî operasyonê qirkerdişê sîyasî yê serra 2009î ra cîya nîyê. Vera kurdan, vera sîyasetê demokratîkî û muxalefetî hêrişî yenê kerdene. No sîstem wazeno ke pêro muxalîfan werte ra wedaro. Hêrişê vera warê cinîyan zî bîyî nîşaneyê naye. Hêrişê vera têkoşînê cinîyan ser nêkewtî û têkoşînê cinîyan dinya de bîyî sembol.

Dansê Şîlî, Şorişê Cinîyan ê Rojawanî yan zî cinîyê Amerîkaya Latîne nê pêro hînî sembol ê. Îqtîdar hêrişo psîkolojîk ano ca. Cinîyî zî têkoşînêkê îdeolojîkî kenê. Cinîyî vera her çîyo ke komel de sey tradîsyono ke nêvurîyeno yeno qebulkerdene têkoşîn kenê. Vurîyayîşêk qewimîya; cinîyî her ca de îradeyê xo mojnenê. Îşkenceyê vera Rojbîne Çetîn zî hêrişê vera têkoşînê ma yo.

Têkoşîn seba cinîyan bi xo cu ya. Cinîyê ke Şorişê Rojawanî ard ca, cinîyê ke her cayê dinya de sîstem vurna têkoşînî ra do fek vera nêdê.''