Vervatoxa Meclîsê Cinîyan ê HDPyî Ayşe Acar Başaran kombîyayîşê çapemenîye yê hewtane de rojdemê derheqê cinîyan de ercna.

Qiseykerdişê Başarane ra beşêk wina yo:

''Nê rojan de cinîyêka ke bi rojan sey rehîne ameye girewtene û ci rê tecawuz ame kerdene, dinyaya xo bedilnaye.  Kurdîstan de tecawuz polîtîkaya şerê taybetî ya dewlete ya. Wextê ablûqayan de, serranê 90an de na polîtîka tim dewam kere. Êlih de çawişêkê pisporî tecawuzê cinîyêka ciwane kerd. Çawiş dima ke vat o serxweş bi ame veradayene. La derheqê rojnameger de ke xebera nê tecawuzî kerde tehqîqatêk dîya destpêkerdene. Înan waşt ke no serebût mîyan bikerê çunke aya ke ci rê tecawuz ame kerdene, cinîyêka kurde bîye û oyo ke tecawuzê cinîye kerd unîformakerde bi.

Dima bi se hezaran merdiman medyaya komelkîye de nêrazîbîyayîşê xo mojna no tecawuzker ame tepiştene. Heyf ke Tirkîya de edalet medyaya komelkîye de yeno cigêrayene. Edlîyeyan de sîstemê serdestîya camêrdan esto la edalet çin o.

Heqê wezîrî çin o ke ma rê hesab biperso.

Ewro Peymana Îstanbulî rojdem de yo. La cara na peymane nêameyêne caardene. Eke biameyêne caardene cinîya ke Agirî de çend reyî muracatê qereqolî kerd nika do biciwîyayêne.

Ma reyna venga AKP MYKyî danê ke ma do Peymana Îstanbulî ra fek vera nêdê. Ma do rixmê hêriş û manîpulkerdişanê şima zî do destkewteyanê xo bipawê.

Vizêr serrgêra darbeya qeyûmî bîye. Qeyûmî ma rê mesajê 'Ma do nêverdê ke şima nê cayan bi îradeyê xo temsîl bikerê.' da. Darbeya qeyûman vera cinîyan a. Weçînayîşê 31ê Adare de 1389 namzetanê şaredaran ra 45 tenî cinîyî bibî. Înan ra zî 24 tenî HDPyî ra bîyî. Ma bi xebatan, hemserekîye û şaredarîtîya cinîyan dinya de bîyî rayberê mîsalêkî.

Şaredarîtîya cinîyan û hemserekîye destkewteyê ma yê ke ma do tira sey Peymana Îstanbulî fek vera nêdê.''