Meclîsê Cinîyan ê HDPyî Îstanbul de çarçewa Kampanyaya 'Semedê cinîyan edalet' de derheqê binpaykerdişanê heqanê merdiman ê zîndanan de waşt ke verê Edlîyeyê Çaglayanî de eşkerayîya çapemenîye bidê la polîsan hêriş kerd destûr nêda. Cinîyan dima ra  Şîşlî de eşkerayîye daye.

Vervatoxa Meclîsê Cinîyan ê HDPyî Ayşe Acara Başarane ard ziwan ê semedê embazanê xo yê ke seba ke verê qîtîdarî de çok nêda zîndan de yê waşt ke eşkerayîye  bi la zîhnîyetê hêrişkarî reyna rîyê xo ramojna. Başarane vat: ''Her roje cinîyî yenê kiştene û raştê tecawuzî yenê û hukmo camêrd zî pê bêcazayîye xelat dano camêrdan. Cinîyî meydanan de hela ke têkoşîn kenê raştê hêrişî yenê. Reyna nezaret de zîndanan de cinîyan rê her qeyde îşkence yeno kerdene.

Ewro îqtîdarê AKPyî sûcanê pîlan ê tarîxî keno. Cinîyan rê cigêrayîşê rutî ferz keno. Hela ke ma vanê 'cigêrayîşo rut îşkence yo û îqtîdar nê sûçî keno' vervatoxê îqtîdarî nayî înkar kenê û kenê ke nê bikerê meşru. Tewr peynî de Serekwekîla Grûba AKPyî Ozleme Zengîn zî wina kerd. Seba ke cinîye yew serre nê sûco ke ci rê bîyo nêeşekaye îfade bikero reyna cinîye bîye sûcdar.

Pê destê dewlete, îqtîdar, leşker û polîsan û îdarekaranê zîndanan sere de vera cinîyan cigêrayîşo rut yeno kerdene û ma do vera nê îşkenceyî  têkoşîn bikerê. Ma do vera şima pay vinderê û sîstemê şima yê hukmî  muhakeme  bikerê. Şima nêeşkenê  ma muhakeme bikerê. Vera heme zordarîyanê şima ma do peyser game meerzê. Ma do nê welatî de sîstemo ke cinîye do tede azad biciwîyo, ronê.''