Êlih de cinîya ciwane ya bi nameyê Îpeke Er dima ke maruzê tecawuzê çawişê pisporî yê bi nameyê Musa Orhanî bîye xo kişt. Wekîla HDPyî ya Êlihî û Vervatoxa Meclîsê Cinîyan ê HDPyî Ayşe Acar Başaran ANFyî rê derheqê mesele de qisey kerd û ard ziwan ke ganî no serebût bi hawayêkê cidîyî bêro ercnayene. 

Başarane vat: ''îqtîdarê AKP-MHPyî xîret keno ke her warî de serdestîya camêrdan awan bikero. No xîret bi tacîz, tecawuz û şîdetê vera cinîyan xo eşkera keno. Agirî de 35 rojan de 5 cinîyî bi hawayêkê şikdarî merdî. Agirî de warê ke cinîyî eşkayêne tede xo îfade bikerê ameyî çinkerdene. Êlih de zî bi polîtîkaya qeyûmî dezgehê cinîyan wedarîyayî.Nika pêro Kurdîstan de rewşe wina ya Eke Êlih de yew dezgehê cinîyan bibîyêne beno ke Îpeke xo resnayêne ci û nêkiştêne. Xokiştişê Îpeke Er seke mektubê ci de dîyeno seba edaletî qirayîş bi.''

Ayşe Acar Başaran bale ante ser ke ganî serebûtê Îpeke Er sey netîceya metodê şerê taybetî bêro ercnayene û vat: ''Serebûtê Îpeke Er têna polîtîkaya dişmenîya vera cinîyan a îqtîdarî nîya, Kurdîstan de parçeyêkê polîtîkaya şerî yo.Wextê DAÎŞî de, 90an de Kurdîstan de serebûtê winasênî zaf qewimîyayî. Tehqîqat û dewayî ameyî akerdene la dima serê înan ameyî girewtene. Kurdîstan de keso biunîforma wina fikirîyeno ke heqê ci esto ke tecawuzê cinîyan ê kurdan bikero. Musa Orhanî vatbi ke 'Mi rê çîyêk nêbeno.' Axir raşta zî nêbi. Orhan têna 7 rojan nezaret de mend. Ganî na sey hîşmendîya şerê taybetî bêra dîyene. Îqtîdarî xîret kerd ke vengê cinîya ciwane bibirno. Nika zî xîret keno ke mesele manîpule bikero û her roje Îpeke Er sûcdar keno.

Ewro Kurdîstan de vera dezgehanê cinîyan ê sey Komeleya Rosa û TJA tedaya girane esta. Embazê ma sereştişan de tepişîyayî û înan ra derheqê Gulîstane Doku û 8ê Adare de persî ameyî persayene. Nê dezgehî ameyî hedefkerdene. Wexto ke Peymana Îstanbulî û Madeya 6284 ser o nîqaşî ameyî kerdene şîdetê camêrdan zî xo rêxistin kerd. ''

Başarane eşkera kerd ke Peymana Îstanbulî bi hawayêkê fîîlî nêna caardene û vat: ''Na menge 27 cinîyî merdî ke înan ra 23ê ci mergê şikdar ê. Seba ke bi bahaneya pandemî Peymana Îstanbulî û 6284 nêameye caardene cinîyî ameyî qetilkerdene. Rixmê nê çîyan zî têgêrayîşê cinîyan xo ver dano.''