Meclîsê Cinîyan ê HDPyî derheqê dîyarkerdişê xeta têkoşînê polîtîkî ya dewrê neweyî, îtîfaqê demokrasî, hêrişanê vera destkewteyanê cinîyan, tecrîdê Îmraliyî, rewşa tepişteyanê nêweşan, binpaykerdişê heqanê merdiman  û 8ê adare de kombîyayîşêko online serûber kerd.

Hemsereka Pêroyî ya HDPyî Pervîne Buldan zî tewrê kombîyayîşî bîye. Verî Vervatoxa Meclîsê Cinîyan ê HDPyî Ayşe Acar Başaran qisey kerd.

Başarane bale ante rewşa tepişteyanê nêweşan ser û vat: ''Rewşa tepişteyanê nêweşan kerdişanê serranê 80an ra cîya nîya. Zîndanan de merdimî mirenê. Îqtîdar vera tepişteyanê nêweşan huqûqê dişmenîye ano ca.''

Başarane ard ziwan ke Rayberê Şarê Kurdî Abdullah Ocalan binê tecrîdî de yo û vat: ''Tecrîd nîşaneya nêzdîbîyayîşê meseleya kurdan a. Îqtîdarî 2015 ra dima pê polîtîkayanê înkar, şer û asîmîlasyonî waşt ke mesele çareser bikero û tecrîd kerd xorinêr. Îqtîdar pê geşkerdişê neteweperwerîye û tecrîdî xîret keno ke payan ser o bimano. Îqtîdar pê eşkerayîyanê serê Ocalanî wazeno manîpulasyonan bikero. Ma vanê wa berê Îmraliyî bêrê akerdene. Tecrîd têna vera Ocalanî nê vera pêro komelî yo.''

Başarane peynîya qiseykerdişê xo de bale ante 8ê Adare Roja Cinîyan ê Kedkaran a Dinya ser û vat: ''Rojanê ke hişmendîya camêrdan tira tersena ra yew zî 8ê Adar a. Ma a roje do meydanan de bibê. Ganî ma îtîfaq û paştdayîşê cinîyan pîl bikerê.''