Merkezê Heqanê Cinîyan ê Baroyê Amedî ra Avûkate Hatîce Demîr derheqê şîdetê vera cinîyan û Pêkerdişê Îstanbulî de ajansê ma rê qisey kerd.

Demîre bale ante şîdetê serê cinîyano ke bi destê îqtîdarî yeno kerdene ser û vat: ''Cinîyî çend rêxistinkerde xover danê, vera polîtîkaya hêrişkare têkoşîn kenê hetê îqtîdarê camêrdî ra sey tehdîtî yenê vînayene. Şîdetê vera cinîyan û domanan, tacîz, îstîsmar pêro yewbînan rê girêdaye yê. Kulturê camêrdê serdestî de cinî û domanî sey kerdox nê semedê dewamkerdişê nîzamî sey çî yenê vînayene. Ewnîyayîşo winayên şîdetî aferneno. Xora îqtîdaro sîyasî zî mekanîzmayê ke şîdetî afernenê weye keno. Mesale zewajê domanan wasifnenê.

Pêkerdişê Îstanbulî semedê wedartişê şîdetê vera cinîyan 2011 de Îstanbul de ame morkerdene û  moro verên Tirkîya da piro. Pêkerdiş çar madeyan ser o ame kerdene. Vergirewtişê şîdetî, pawitişê mexdûre, cezakerdişê hêrişkarî û vera şîdetî raameyîşê polîtîkayanê bitesîran. Cinîyî heqanê xo yê Pêkerdişê Îstanbulî û madeyê 6284î ra hayîdar ê û semedê caardişê înan têkoşîn kenê la meqamê edlî cinîyan nêpawenê û pêkerdiş kenê bêtesîr.

Batelkerdişê Pêkerdişê Îstanbulî yeno manaya meşrukerdişê şîdetê vera cinî û domanan.  Hukm zîhnîyetê camêrdî esas gêno û keno weye. Pawitişê hêrişkar camêrdan heme sey yewbînan o. Heme camêrdê hêrişkarî xo bi heman argûmanan pawenê. No tesaduf nîyo. Vanê; ''Goştarî mi nêkerd'', ''mi rê îtaat nêkerd'', ''şewe vejîyaye teber'', ''wina kincî kerdî piray'', ''va ez werd nêpojena'' ya zî ''mi xapîna''. Çi heyfo ke êyê ke hukm anê ca nîna goştarî kenê û ge-ge heq danê înan. Goreyê cigêrayîşêk dosyayanê cinîyanê ke şîdet dîyo de se ra 45 de tehrîqo bêheq û wardayîşê halê hole ameyo caardene. No yeno no mana ke tatkîkê camêrdî semedê xo pawitişî şuxulnenê hetê hukmî ra yenê qebulkerdene.  Gerek Pêkerdişê Îstanbulî pratik de bêro caardene ke verê şîdetî bêro girewtene.''