Endama Koordînasyonê PAJKî Bêrîtane Cûdî beşdara bernameyê 'Rojeva Jinê' yê Stêrk TVyî bîye û rojdem ercna.

Qiseykerdişê Bêrîtane Cûdî ra beşêk wina yo:

''Dewleta tirke pê bahaneya PKKyî sivîlan ser o bombayan varnena. Na çîyêka bêexlaqî ya. Ma vajê PKK uja de bibo zî heqê ci çin o ke hêrişanê winasênan bikera. Sebebê ci çi beno wa bibo kişîyayîşê sivîl, doman û cinîyan sûcê şerî yo. PKK xora bîyo şar, ê kesê nêeşkenê sivîl û milîtanan yewbînan ra cîya bikerê. 

Qirkerdişê 3 cinîyan o ke Kobanê de ame kerdene heman wextî de vera şorişê cinîyan o. Embaze Zehra û Hebûn rayberê Têgêrayîşê Cinîyan bîyî. Şexsê cinîyan de komelê ma yeno çnkerdene. Efrîn de îşxalkeran cinîyan rê tecawuz kenê û meyîtanê înan erzenê cayêk.  Rayber Apoyî vatbi ke 'Eke welatêk de cinîyî kişîyenê ez nêwazena biba hemwelatîya ci.' Coka ganî cinîyî rayraşîyayîş û çalakîyanê xo de ganî bi vengêkê berzî vajê ke Erdogan kiştoxê cinîyan o.

Dewlete pê operasyonê Heftanînî armanc kena ke verê gerîlayan bigêra, nêverda ê şorê Başûrê Kurdîstanî. Xora tim teyarayê keşfî herême ser o gêrenê, sînorî girewte yê. Na rewşe bi xo yena a a manaya îşxalê Başûrî. Dewleta tirke wazena erdê xo bizêdîna. 

Rixmê hende bombardumanan têna yew di girî vistî destî. No serkewtiş nîyo. Serkewtişo raştikên çalakîyanê gerîlayan de nimitke yo. Rixmê hende teyarayan, bombardumanan gerîlayî şewe û roje çalakîyan kenê. Serkewtiş no yo. Seke Seyîd Rizayî vatbi dişmen eşkeno ver bi Kurdîstanî sefer bikero la nêeşkeno ser bikewo.

Dişmenî cara dişmenîya xo kenê. Oyo grîng no yo ke ma se kenê.Nê wextan de welatperwerîye girîng a. Eke ma nê prosesî hol îdare nêkerê îşxalkerî ci ra îstîfade kenê. Eke ma raşt têbigêrê ma do ser bikewê. Coka ganî her kes cewabê persê 'Ez çend azad a, ez çendek peyê cuyêka azade de ya?' bido. Ganî çew bi hawayêkê negatîfî nêzdîyê mesele nêbo. 12ê êlule de ê rojanê tarîyan ra dima Têgêrayîşê Azadîye yê Kurdîstanî ame ronayene. Serkewtiş ê ma bi. Têgêrayîşê ma vera DAÎŞî zî ser kewt. Qet yew dewlete nêeşkena vera hêzê şarî vindera. Ganî ma pê ruhêkê serewedaritiş û xoverdayîşî têbigêrê.''