Endama Koordînasyonê KJKyî Besê Erzîncan bi wesîleya 8ê Adare Roja Cinîyan ê Kedkaran a Dinya ANFyî rê qisey kerd.

Qiseykerdişê Besê Erzîncan ra beşêk wina yo:

''8ê Adare seba cinîyan vera koletîye û neheqîye roja serewedaritişî ya. 2021 seba cinîyan û şarê kurdî bîye serrêka girane ya xoverdayîşî. Cinîyan û şarê ma vera teda, xizanîye, koçberîye, tepiştiş û polîtîkayanê şerê taybetî yê dewleta tirke bi hawayêkê pîlî xo ver da. Gerîlayan na serre bi îradeyêkê bêhempayî vera  hêrişanê dewleta tirke û hêzanê ci yê hemkaran xo  têkoşîn kerd. 

Rayberê ma 24 serrî yo binê tecrîdêkê giranî de xo ver dano. 11 mengî yo tira xebere nêna girewtene. Bi tecrîdê girankerdeyî yeno waştene ke verê sîstem û cuya alternatîfe yê Rayberîye bêro girewtene. Hêzê sîstemê modernîteya kapîtalîstî bi nê hawayî xîret kenê ke Rayberê ma ra qesas bigêrê. La Rayberîye bi paradîgmaya xo tecrîd şikna û îdeolojîya azadîye resnaye merdiman. Xêrê na îdeolojî ra cinîyî, şarê ma, hêzê azadî û demokrasî yê dinya bi têkoşîn û xoverdayîşê xo sîstemê serdestîya camêrdan çin kenê. Rojdem û erko sereke yê têgêrayîşê cinîyan caardişê azadîya Rayber Apoyî yo. Nê esasî ser o çalakîyê ma heta azadîya ey do dewam bikerê.

Cinîyî nika mîyanê hemleyêka pîle ya azadîye de yê. Cinîyî seba azadîye têkoşîn kenê û qetî bendan nêşinasnenê. Cinîyî di serrî bi bahaneya janê Korona keyeyan de ameyî hepîskerdene, mîyanê sîstemê şîdetî de vera dîyayî. Sîstemê serdestîya camêrdan tim xîret keno ke tewirê cinîyan bixeniqno. Cinîyê ciwanî benê hedefê polîtîkayanê şerê taybetî. La cinîyî zî têkoşînê xo xurtêr kenê. Têkoşînê azadîye yê cinîyan hêzo sereke, radîkal û dîyarker o.

Xoverdayîşê gerîlayanê YJA-Starî 2021 de morê xo da binê prosesî. Gerîlayanê YJA-Starî Herêmanê Pawitişî yê Medya de serkêşî û temsîlîya gerîlaya modernîteya demokratîke kerde. Zîndanan de 2021 de cinîyan xoverdayîşo pîl aferna. Tirkîya û Îran xîret kenê ke pêro cinîyan ê xoverdayoxan bierzê zîndanî. Kerdişê vera Aysele Tugluk, tepişteyanê nêweşan metodê qesasî yê. 

Tirkîya de êyê ke vera îqtîdarê AKP-MHPyî muxalafetê tewr radîkal û çêrî kenê cinî yê. Coka dewlete hêrişanê xo yê tewr pîlan vera cinîyan kena. Tirkîya de zulmo tewr pîl, îşkence û şero taybet vera cinîyan ê kurdan yenê kerdene. La cinîyê kurdî tewr vernî de xo ver danê. Yewîya cinîyan do peynîya faşîzmî bîyara. Cinîyê kurdî rayberîya rijnayîşê faşîzmî anê. Şexsê Emîne Şenyaşar de têkoşînê edaletî hetê cinîyan ê kurdan ra yeno kerdene.

Îran xoverdayîşê cinîyan, serewedaritişê cinîyan ra terseno û cinîyanê xoverdayoxan ê sey Zeynepe Celalîyan erzeno zîndanî. Coka Kampanyaya 'Zenebe Celalîyan rê Azadîye' zaf girîng a. Ma venga pêro cinîyan danê ke tewrê na kampanya bibê. Dewleta Îranî xora 8ê Adare qedexe kerdo. Na hişmendîye cinîyan têna sey dadîyan vînena. Şorişê Îranî sey şorişêkê cinîyan qewimîyeno.

Başûrê Kurdîstanî de rolo ke mîyanê komelî de cinîyan rê dîyeno qet nêno qebulkerdene. Ganî Başûr de pêro cinîyî rêxistinî û yewîya xo bîyarê ca û seba azadîya Rayberîye têkoşîn bikerê. Cinîyê Başûrî eke tewrê têkoşînê cinîyan bibê do bieşkê heqanê xo bivisnê destî. Cinîyê Şingalî xeta azadîya cinîyan a Serek Apoyî de resayî pê. Ewro cinîyê Şingalî wayîrê erd û azadîya xo vejîyenê. Cinîyî do kulturê êzidîyan bi xoverdayîş û têkoşînê xo tim bikerê. Rojawan de cinîyî hetê xopawitiş, hetê awankerdişê neteweya demokratîkî ra aver şinê. Cinîyê Rojawanî afernayoxê Şorişê Rojawanî yê. 

Cinîyê kurdî çar hetanê dinya de, Ewropa de pê tewir, kar û têkoşînê xo rolê xo yê serkêşîye anê ca û serkêşîya cinîyanê dinya kenê. Sey cinîyan ê kurdan ma do serra 2022î de cinîyanê Rojhelatê Mîyanênî û dinya reyde têkoşînê xurtêr û bitesîrî bikerê.''