Hemsereka Konseya Rayberdişî ya KCKyî Besê Xozat Bernameyê Taybetî yê Stêrk TVyî de babetê Komployê 9ê Teşrîna Verêne ya 1998î û Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' ercnayî.

Qiseykerdişê Besê Xozat ra tayê noqtayê girîngî wina yê:

''Ma hê dekewenê serra 27ine ya Komployî. Komplogeran waştêne ke bi mudaxeleyê xo tesîrê Rayber Apoyî û PKKyî yê serê komelî bişiknê. La komployî ra pey eqsê ney mîyanê kurdan de vurîyayîşê pîlî qewimîyayî. Komplo serkêşîya Amerîka, Îngilîstan û Îsraîlî de hetê hêzanê mîyanneteweyîyan ra ame kerdene. Çunke nê fikranê Rayber Apoyî ra tersayêne. Hêzanê globalan reyde hêzanê herêmîyan ê sey PDKyî zî hemle de cagirewt. 

Rayber Apoyî cara 1998 de adirbirnayîş îlan kerdbi û seba çareserîya meseleya kurdan Sûrîye ra verê xo dabi Ewropa. La hêzanê ke çareserîye nêwaştêne komplo ard ca. Çunke xêrê meseleya kurdan ra nê hêzî dewleta tirke şuxilnenê. Bi komployî ame hedefkerdene ke têkilîya Rayber Apoyî ya bi cinî, şaran û teberî bêra birnayene. La Rayber Apo 26 serrî yo Îmrali de xo ver dano û no xoverdayîş ey keno lîderê dinya. Hetê bînî ra tecrîd vera şarê kurdî zî konseptê qirkerdişî yo. Tecrîdî reyde şerê vera kurdan yeno xorinkerdene. 

Dewleta tirke û komplogeran seba ke komployî ra netîceya goreyê zerrîya xo nêgirewte tecrîd tim giranêr kerd. Rayber Apoyî û şarê kurdî vera komployî xoverdayîşêko pîl mojna ra. Komplerî nêeşkayî Rayber Apoyî îmha bikerê, PKKyî tasfîye bikerê û îradeyê şarê kurdan teslîm bigêrê. Şarê ma û Rayber Apoyî nê 26 serran de têkoşînê xo pîlêr kerd. Nê 26 serranê komployî de bi taybetî xoverdayîşê Îmraliyî yê Rayber Apoyî şarê kurdî û şaranê herême ser o tesîrêk pîl kerd. Komplogeran se kerd nêkerd nêeşkayî biresê armancanê xo.

Rayber Apoyî Îmrali de paradîgmaya Neteweya Demokratîke û Konfederalîzmê Demokratîkî viraşte. Ey bi nê hawayî komplo zî pûç kerd. Xoverdayîşê Rayber Apoyî şarê ma rê zî bi îlham. Têkoşînê şarê ma maskeya dewleta tirke û komplogeran eşkera kerde. Ewro Rayber Apo lîderê şaran o. Hêzê komplogerî bin kewtî û ê do qetî netîce nêgîrê.

Hemleya 'Rayber Apoyî rê Azadîye, Meseleya Kurdan rê Çareserîye' 10ê teşrîna verêne ya 2023yî de dîyaye destpêkerdene. Na hemle netîceyê girîngî vetî werte. Na hemle kerd ke paradîgmaya Rayber Apoyîn û têkoşînê azadîya Rayber Apoyî vila bibê. 69 wayîranê Xelata Nobele ra bigêrê heta 1500 avûkatan xeylêk kesan dinya ra paştî daye na hemle û azadîya Rayber Apoyî waşte. Xêrê na hemle ra CPT çend reyî neçare mend ke eşkerayîyan bido. 

Şarê ma zî çarçewa hemle de wina serrêke payan de ser bi û têkoşînêko bitesîr kerd. Ewro nê têkoşînî ra dewleta tirke xeylêk teng bîya. Yanî hemle ser kewte. Nika ganî ma bifikirê ke senî na hemle aver berê. 

Komîteya Wezîran a Konseya Ewropa zî bi tesîrê na hemle neçare mende ke derheqê heqê hêvîye de bire bigêra û vaja 'Îmrali de tecrîd est o.' La çîyo winayên zî est o ke Komîteya Wezîran ancî seba caardişê heqê hêvîye serrêke daya Tirkîya. Yanî dezgehanê komplogeran têgêrayîşanê xo de çend vurîyayîşî kerdê la bi wextdayîşî zî destekê xo yê bi dewleta tirke mojna. Ganî Ewropa û dezgehê Ewropa nêbê hemkarê sûcanê Tirkîya. Ganî tecrîd û îşkence bêrê wedaritene. 

Seke ma vat Hemleya Azadîye serrêke xo pey de verdaye. Ganî safhaya diyîne ya hemle de ma hişyar bibê. Aseno ke dewleta tirke şerê qirkerdişî de israr kena. Coka ganî safhaya diyîne bi xoverdayîşê topyekûnî dewam bikera. Ganî ma na hemle de caardişê azadîya Rayber Apoyî esas bikerê. Çunke merkezê şerî Îmrali yo. Ganî ma meydan, kuçe û taxan veng nêverdê. Warê sîyasetî de zî ganî têkoşînêko xurt bêro kerdene. 

Rayber Apo pêro Kurdîstanî temsîl keno. Coka hêrişê vera Rayber Apoyî hêrişê vera Kurdîstanî yê. Wa şarê ma bi xoverdayîş û têkoşînî serra diyîne ya hemle pêşwazî bikero. Ganî fikrê Rayber Apoyî bi hawayêkê bitesîrî bêrê vilakerdene. Azadîya Rayber Apoyî azadîya şarê ma û yê Kurdîstanî ya. Nê esasî ser o têkoşîno topyekûn wa bêro kerdene.''