Beyannameyê HDP’yî yê weçînitişî: HDP partîya cinîyan a

Partîya Şaran a Demokratîke (HDP) Amed de bi kombîyayîşêk namzedê xo yê cinî dayî şinasnayene û beyannameyê xo yê weçînitişî eşkera kerde.

HDP’yî kombîyayîşê Amedî de namzedê xo yê cinî yê 31’ê Adare dayî naskerdene û beyannameyê xo yê weçînitişî eşkera kerde.

Kombîyayîş de hemsereka Pêroyî ya HDP’yî Pervîn Buldane qisey kerd. Buldane bale ante xoverdayîşê grevê vêşanîye ser û va: ‘‘95 rojî yo ke Leyla Guvene grevê vêşanîye de ya. Reyna zîndanan û surgun de bi seyan xoverdayoxanê bînan bedene xo  dayê vêşanîye ver. Xoverdayîşê înan xoverdayîşê ma yo. Tecrîd do bi xoverdayîşê cinîyan bêro şiketene.‘‘

Buldane vist vîrî ke wextê weçînitişê serra 1999’î de HADEP de 3 namzedê şaredarîye yê cinî bibî  û best pa: ‘‘Serranê 2004 de 9, 2009 de 14 serekîya şaredarîye ma cinî bîyî. Ma  zereyê şorişî de şoriş kenî. Xoverdayîş de ma azadîya cinî peyser nêerzenî.  Ma semedê temsîlîyetê seypêyî sîstemê kota na ro dima ra  sîstemê hemserekîye vist dewre. Hedefê ma gird bî ganî gamê ma zî gird bîyênê. 2014 de  ma bi nê sîstemî kewtî weçînitişî  û heme şaredarîyan de sîstemê hemserkîye ame bicaardene.''

Buldane veng da heme cinîyan û va: ‘‘Şima polîtîkaya dişmenê cinîyan ê AKP-MHP’yî rê mecbûr nêyî. Ma estî. Partîya cinîyan HDP esto. Paştîdayîşê HDP’yî paştîdayîşê cinîyan o. Her rey ke dîyeno HDP’yî hêzê dano mucadeleyê cinîyan. Tay mende şaredarîyê ma ke ameyî xespkerdene, ma do peyser bigerê. Na herre de zîhnîyetê qeyûmî nê azadîya cinîyan do bêro ciwîyayene. Yewna cuye mukun a û rayberîya na cuyeya neweye zî  do HDP bikero.‘‘