Fatma Mihemed (49) bazarî ra xebitêna û debarê xo wina kena. Fatma wazena ke seba cinîyanê ke wazenê bikewê komelî mîyan, biba nimuneyêke.

Fatmaya Efrînije 10 serrîya xo ra musaya ke karanê destkarî bikera û hewl dana ke zehmetîyanê ekonomîkan reyde îdare bikera. Fatma 2006î de wexto ke Haleb ra ameya û reya verêne dezgehê xo akerda û heta nika bazaran ra bi rotişê destkaran debarê xo kena.

Hişmendîya komelî bedilnaye

Wexto ke Fatma newe dezgehê xo akerdo şar aye rê reaksîyon dayo, Fatma ê rojî wina îfade kerdî: ‘‘Haleb de ma banderê ucayî bîybî. Ma êdî pêro yewbînî şinasnayêne la wexto ke ma ameyê Qamişlo û mi qerar da ke ez dezgeh abikera, şar reaksîyon da mi. Bi taybetî camêrdan vatêne xebityayîşê cinîyan şerm o, eyb o. Eslê xo de cinîyan zî reaksîyon daybî, mat mendbî seba cesaretîya mi la hêdî-hêdî banderê dezgehê mi bîyê. Verê, seke ez çîyo ke eyb kena, wina ameyêne vatene la mi xo reyde pîya zaf cinîyî teşwîq kerdî. Mi xo şinasna û mi fam kerd ke wexto ke cinîyêke bi xo bieşkîya linganê xo ser o bivindera senîn o. Mi hişmendîya vera cinîyan şikinaye, ma bîyê sey keyeyêkî.’’