Têgêrayîşê Cinîyan ê Azadan (TJA) çend hewteyî verê cû vera tecrîd, tacîz, tecawuz û qeyûman Kampanyaya 'Ma do xo bipawê' ya 4 mengan daye destpêkerdene. Aktîvîsta TJA û Hemsereka DBPyî ya Amedî Sevale Gulmez derheqê kampanya de ANFyî reyde qisey kerd. 

Sevale Gulmez teda û zorbazîya 6 hezar serran a vera cinîyan ser o qisey kerd û vat: ''No sîstem hînî bi destê AKP-MHPyî yeno caardene. Cinîyî tim yenê qetilkerdene. Bi qirkerdişê cinîyan aslê xo de komel yeno qirkerdene. Têna cinîyî eşkenê komel bîyarê pêser, yewpare bikerê. 

Ma vera hîşmendîya camêrdan na kampanya daye destpêkerdene. Ma estbîyayîşê cinîyan hetê bîyolojîkî ra nêgênê destî. Ma xîret kenê ke cinîyî abigêrê 6 hezar serrî verî û biresê cewherê xo. Ma wazenê kampanyaya xo reyde çîyanê ke komelî ra dizîyayê, apey bidê ci. Xopawitişê cinîyan komelbîyayîş o. Her tewirê xopawitişî heq û heqîqat o.''

Gulmeze eşkera kerd ke 40 serranê peyênan de cinîyê kurdî zaf şîyar bîyî û vat: ''Kurdîstan de cinîyê ma hînî nê sîstemê teda qebul nêkenê. Vera cinîyan polîtîkayê şerê taybetî yenê caardene. Cinîyan rê tacîz, tecawuz û şîdet yenê kerdene. Cinîyî bi zorî erzîyenê mîyanê sîstemê fuhuşî. Na babetan de ganî her çî ra verî cinîyî wayîrê cinîyan vejîyê. Ganî ma waranê xo yê perwerde, têkoşîn, ekonomî û cuye awan bikerê. Ganî cinîyî bibê yew. Ma pîya meseleyanê xo ganî çareser bikerê.

Bi na kampanya ma gama verêne eşte. Ma do çarçewa kampanya de her ca de cinîyan reyde bêrê pêser.Meseleyanê cinîyan goştarî bikerê. Reyna ma konferans, panelan serûber bikerê û bi rayîrê eşkerayî û roportajan kampanyaya xo dewam bikerê. Ma do nê têkoşînî de ser bikewê.''