Endama Koordînasyonê KJK‘yî Zerîn Rûkene, programê Rojeva Jin ê Stêrk TV’yî rê bîye mêman û cewab da persanê rojnamegere Arjîn Baysale. Rûkene, xoverdayoxê grevê vêşanîye silam kerdî û va grevê vêşanîye çalakîyê tarîxîyî yê û wina dewam kerd: “Armancê Leyla Guvene û çalakwananê bînan tena Rayberî de pêvînayîş kerdene nîyo. Ê bi çalakîyanê xo kenê ke tecrîdo 20 serre yo serê Rayber Apoyî bêro şikitene û vera dewleta Tirkan a ke cinî û Kurdan qetl kena de vinderê. Senî ke Rayber Ocalanî komploya mîyanneteweyîye puç kerde, ganî ma zî xoverdayîşo ke bi rayberîya Leyla Guvene ameyo destpêkerdene rê wayîrîye bikerê û xoverdayîşî hîna bikerê pêt.“

Rûkene va nê xoverdayîşî bi rayberîya cinîyan yenê kerdene û Sebahat Tuncele, Selma Irmake, Dîlek Ocalane, Kîbrîye Evrene, Fadîle Toke sey nimûne musnayî û wina va: “Cinîyî, tecrîdê serê Rayber Ocalanî,sey tecrîdê serê pêroyê cinîyan vînenê û bi na hişmendîye wezîfeyê xo yê tarîxîyî anê ca. Çi wext şarê Kurd û Rayber Ocalanî ser xetere bivejîyo, cinîyî rolê xo yê tarîxîyî anê ca û dest bi çalakîyanê wayîrvejîyayîşan kenê. Leyla Guvene û Vîyan Sorane, wextanê cîya-cîyayan de xetereyê serê Rayber Apoyî ferq kerdê û xoverdayîş xo rê  sey wezîfe dîyo. Cinîyî bi hewayêkê zexmî girêdayeyê Rayber Apoyî yê. Çunke cinîyan azadîye bi Rayber Apoyî şinasnaya. Bi xoverdayîşê Leylayan, Rayber Apo sey fîzîkî do şarê xo mîyan de ca bigîro“

HUKMATÊ BAŞURÎ GANÎ ŞARÊ XO HET DE CA BIGÎRO

Rûkene qiseykerdişê xo de qale arde xoverdayîşê Şêladize ser zî û wina va: “Xoverdayîşanê Deraluk û Şêladize de zî cinîyan rolêko muhîm girewt. Şarê Kurdîstanî vera bombarduman û îşxalî xo pawito û wezîfeyê xo yo neteweyî ardo co. Hukmatê Başurê Kurdîstanî ganî şarê xo bipawitêne. La bi têpiştiş û zextan cesaret dano dewleta Tirkan. Şarê Kurdîstanî vano ti nêeşkena welatê mi bombarduman bikerê, la PDK seba ke wina vato, şarê xo tepişena û erzena hepisxaneyan. Neçîrvan Barzanî sey kerdena dewleta Tirkan tepişeno û erzeno zere. Nê kerdenê Hukmatê Başurê Kurdîstanî nênê qebulkerdene. Hukmat ganî hetê dewleta Tirkan de nê, hetê şarê xo de ca bigîro.“

ŞÊLADIZE VERA HUKMATÊ BAŞURÊ KURDÎSTANÎ YA ZÎ

Rûkene keyeyanê merdeyan rê serweşîye waşte û va xoverdayîşê Şêladize, eynî wext de bêvengîya Hukmatê Başurê Kurdîstanî rê yew cewab o. Rûkene wina dewam kerd: “Şarê Şêladize heqdar o û wezîfeyê xo yo neteweyî ardo ca. Reyna şarê Deralok û Şêladize, vera hemkarîya mabênê hukmatê Başur û TC de bêveng nêmendo û reaksîyon musnayo. Ma venga şarê xo yê Başurî danîme û vanîme ke ganî hîna bi welatperwerî tê bigêrê û vera îşxalkeran de mucadeleyê xo hîna bikerê pêt.“

Endama Koordînasyonê KJK‘yî Zerîn Rûkene peynîya qiseykerdişê xo de wina va: “Ma cinîyan ê Kurdan koletîye û faşîzm qetîya qebul nêkerdo. Ma seba ciwîyayîşêkê azadî her tim cad kerd û mucadele kerd. Ewro ra dima zî ma do seba Rayber Apo, seba Leyla Guvene û embazanê aye mucadeleyê xo hîna bikerê pêt û aver biberê.“