Hemvatoxa Delegeyan ya Kongreya Komela Demokratîke (KCD) Zelal Bîlgîne ya ke 9ê Êlule de çarçiweya operasyonanê qirkerdişê sîyasîyan de Amed de bi 140 kesanê bînan a pîya ameyebî tepiştene û vizêr nê perey ameye texlîyekerdene, derheqê çalakîya Leyla Guvene de ANFyî rê qisey kerd.

Bîlgîne vist vîrî ke Guvene 7ê Teşrîna peyêne de dest bi grevê vêşanîye yê bêdem-bêvurayîşî kerd û  pest pa: ‘‘Leyla Guvene  seba wedarnayîşê tecrîdê serê Rayberê Şarê Kurdî Abdullah Ocalanî, 23 rojî yo bi xoverdayîşê girdî çalakîya xo rê dewam kena. Her kes zano ke tecrîdê serê birêz Ocalanî kaosê Rojakewtena Mîyanênî  xore keno.

MESAJÊ GUVENE: ÇALAKÎYA MI DO HETA WEDARTIŞÊ TECRÎDÎ DEWAM BIKERO

Bîlgîne qiseykerdişê xo rê wina dewam kerd: ‘‘Guvene heta nika hole bî la roja 20. ra dima rewşê aye xirab bi. Nêweşîyan dest pêkerd. Guvene ganî hinde dermanê vîtamînê B1î bişuxulno. Ma îdereyê zîndanî ra waşt la nînan cewabê ma nêda.‘‘

Bîlgîne ard ziwan ke çalakîya Guvene reyna îradeya cinîyan ramote û va: ‘‘ Guvene bi esas girewtişê mucadeleyê cinîyan û tradîsyonê xoverdayîşê sîyasetê kurdan  çalakîyêka tarîxî daye destpêkerdene. Guvene heme şarê kurdî û hemrayanê xo rê silam şawitî û vat ke çalakîya aye do heta wedartişê tecrîdî dewam bikero û waşt ke her kes wa tecrîdî biko rojdemê xo yo verênî û paştî bido na çalakîye.‘‘