Komploya mîyanneteweyîye ya 9ê teşrîna verêne ke vera Rayberê Şarê Kurdî Abdullah Ocalan ameye viraştene, 20 serrî xo dima verdaye. Ocalan 9ê teşrîna verêna 1998î de mecbûr mend Sûrîya ra vejîya û 15ê sibata 1999î de hetê hêzanê mîyanneteweyîyan ra bi komloyêk dewleta tirkî rê ame teslîmkerdene. Hemvatoxa Delegeyan ya Kongreya Komela Demokratîke (KCD) Zelal Bîlgîne serrgêra 20. yê komplo de ANF rê qisey kerde.

Bîlgîne tecrîd sey vera heme şaranê Rojhelatê Mîyanênî hesibna û va:‘‘Tecrîd hinde sînoranê Îmrali ra vejîyo. Tecrîd bêhuquqîye ya û qe qeydeyêk de cayê ci çîno. Bi tecrîdî wazenê ke Ocalan û şaran cêser bifînî. Fîkrê Ocalanî ra tersenê û nê semedî ra nêwazenê ke fikrê ey biresî şarî.‘‘

Bîlgîne qiseykerdişê xo wina domna:‘‘Wextê dîyayîşanê aşitî de fîkranê Ocalanî şaranê Tirkîya ser o tesîro gird kerd. Hukmatî zî îtîraf kerd ke fikranê Ocalanî înan ser o tesîr kerdo. La nika heme rayîrî girewtî û destûr nêdanî Ocalan bireso şarî. No zî yeno mehneyê dewamê komplaya mîyanneteweyîye. Heta tecrîd mêro wedarnayene, no şer nêqedîyeno.‘‘

MHME MÎSYONÊ XO VÎN KERD

Bîlgîne qerarê Mehkemaya Heqê Merdiman yê Ewropa (MHME) rê zî hêrsê xo ard ziwan û va:‘‘ MHMÊ zî zaf hole zana ke 15ê sibata1999î ra heta ewro Ocalan Îmrali de senî şartanê xirabin de yo. La qeraro ke 27ê êlule de girewt, bi nê qerarî rol û mîsyonê xo girewt binê lingan. MHME goreyê polîtîkaya dewlata tirkî têgêrena.‘‘

Bîlgîne dîyar kerd ke bi tecrîdî cinîyan rê zî îşkence yeno kerdene û qiseykerdişê xo wina qedîna: Bi tecrîdî wazenê ke qezencanê cinîyan çin bikerî û cinîyan kole bikerî. Ma naye zaf hole zanî. Coka ganî ma têkoşînê azadîya xo hîna berz bikerî û vera tecrîdê Îmrali bivejî.‘‘