Meclîsê Cinîyan ê HDPyî çarçewa kampanyaya ''Têkoşînê Cinîyan her ca de yo'' de verê Merkezê Operaya Sureyya yê qezaya Kadikoyî ya Îstanbulî de kom bi û rayraşîyayîşêk kerd. Hêverî bi seyan cinîyî pê tilîlîyan û erbaneya kom bîyî û înan sloganê ''Cinîye, Cuye, Azadîye'' vat. Cinîyan pankartê bi nuşteyê ''Hemserekîye xeta ma ya mor a'' û ''Efûya îstîsmarî nêbena'' akerdî.

Dima Hemsereka HDPyî Pervîne Buldan ameye meydan cinîyanê Mayanê Haştîye, Meclîsê TJA, Hemvervatoxa HDKyî, Temsîlkara ESPyî û xeylêk temsîlkaranê rêxistinan ê bînan qisey kerd. Cinîyan pare kerd ke ê do qet vera şîdetî sereyê xo nêarê war û her tim meydanê têkoşînî de bibê.

Hemsereka Pêroyî ya HDPyî Pervîne Buldan zî qiseykerdişê xo de nê çîyî ardî ziwan: ''Ma ewro fînalê kampanyaya xo kenê la ma zanenê ke cinîyî dotêkoşînê xo dewam bikerê. Îqtîdar dişmenê cinîyan o. Ma venga cinîyanê Tirkîya danê ke vera nê îqtîdarî bêvng nêmanê. Roje çin a ke cinîyî yenê qetilkerdene. Cinîyî pê têkoşîn û bedelanê pîlan ameyî heta ewroyî. Şaredarîyanê HDPyî rê qeyûmî yenê tayînkerdene ke nê qeyûmî hêverî hêrişê keda cinîyan kenê. 

Nê îqtîdarî serra 2011î de Peymana Îstanbulî îmza kerde. La nêarde ca. Pê îşkenceyê vera Rojbîne Çetîn Peymana Îstanbulî ameye binpaykerdene. Pê tepiştişê Gultene Kişanak, Sebahate Tuncel û Fîgene Yuksekdag peymane ameye binpaykerdene. Ma soz danê ke ma do têkoşînê xo dewam bikerê. Hînî destê xo cinîyan ra biancê.''