Cenazayê şehîdan ê cinîyan Nevîne Dînç, Aysele Karaduman û Esra Atici binê ablûqaya hêzanê tirkan de ameyî definkerdene. 

Cenazaya Endama YPS-JIN Nevîne Dînç (Bêrîtane Amed)a ke 2016 de qezaya Geverî ya Colemêrgî de şehîd bibî goristanê bêkesan ê Erziromî de amebî definkerdene. Keyeyê Dînçî 5 serran ra dima cenazaya kênaya xo girewte. Destûr nêdîya ke keyeyî ra berî çew tewrê merasîmê definî bibo û semedê definkerdişî têna 5 deqayan ame dayene. Dima zî keye goristanî ra ame vetene.

Cenazaya gerîlaya YJA-Starî Esra Aticiya ke herêma Besta ya Şirnexî de şehîd bibî 6 mengan ra dima dîyaye keyeyê ci. Keyeyê Aticiyî Anqara ra ame Şirnexî, îfade da dozgerî û dima zî goristanê bêkesan ra cenaza girewte. Cenazaya gerîla Esra Atici goristanê Yenikoyî yê qezaya Rezanî yê Amedî de binê ablûqaya polîsan de ameye definkerdene. Dormeyê goristanî pê TOMA û wesayîtanê zirxînan ame girewtene.

Cenazaya gerîlaya YJA-starî Aysele Karaduman (Dîcle Botan)a ke çend rojî verî herêma Besta ya Şirnexî de şehîd bibî hetê keyeyî ra Nêweşxaneyê Dewlete yê Şirnexî ra ameye girewtene. Keyeyî binê ablûqaya polîsan de cenaza goristanê Asrî yê Cizîre de defin kerde. Xeylêk kesî tewrê definkerdişê cenaza bîyî.