Şaristanê Cenevre û Luzernî yê Swîsre û şaristanê Duisburg û Kolnî yê Almanya de pê çalakîyan şîdetê vera cinîyan ame protestokerdene.

Cenevre de Têgêrayîşê Cinîyan ê Kurdan ê Swîsre û rêxistinanê Swîsre pê çalakîyêke şîdetê vera cinîyan protesto kerd. Cinîyê ke Parka Bastinosî ya Cenevre de ameyî têhet heta Plainpalaise rayîrî ra şîyî.

Luzern de zî seba heman armancî çalakîyêke ameye kerdene. Çalakîye de cinîyê ke maruzê şîdetê camêrdan û dewleye bîyî ameyî vîrvistene. Cinîyan vera şîdetî seba paştdayîşî veng da.

Bajarê Duisburg de rayberîya Meclîsê Cinîyan ê Şehîde Asya Yuksele de çalakîyêke ameye organîzekerdene û xeylêk rêxistene cinîyan ê bînî zî tewrê ci bîyî. Çalakîya ke şîdetê vera cînîyan ame şermezarkerdene û seba çalakîya 23ê gulane ke do hêrişê vera Mexmûr, Zînî Wertê û HDPyî bêro protestokerdene ame vengdayene.

Koln de  sey her hewteyî no çarşeme zî cinîyî çalakîye de bî. Cinîyan vist vîrî ke Almanya de vera cinîyan şîdet zêdîyayo û bale ante hêrişê vera cinîyan û domanan ê Tirkîya ser. Çalakîya ke xeylêk rêxistene cinîyan tewrê ci bîyî  de ame vatene ke cinîyî do xoverdayîşê xo girdêr bikerê.

Çalakîyan de slogana ''Cinîye, Cuye, Azadîye'' ame vatene.