Amed de cinîyê ke serkeşîya Têgêrayîşê Cinîyan ê Azadan (TJA) û Platformê Cinîyan ê Dîcle Amedî (DAKP) de  ameyî pêser vat ma do Pêkerdişê Îstanbulî ra peyser game meerzê.

Îdarekarê HDP, DBP, Tuay-Der, MEBYA-DERî zî tede xeylêk kesî tewrê çalakî bîyî. Cinîyanê ke waştêne Çatrayîrê Dinya ra ver bi Parka Rojawa şirê hetê polîsan ra ameyî astengkerdene. Seba bi talîmatê walîyî destûr nêdîya rayraşîyayîşî cinîyan eşkerayîya çapemenîye da.

Eşkerayî de nê ameyî vatene: ''Hukmatê AKPyî seba ke cinîyan sey tehdîtî vîneno paştî dano qetilkar û tecawuzkaran. Têna aşma temmuze de 36 cinîyî ameyî mirênayene. Seba ke qetilkarî nînê cezakerdene, verê hêrişan zafêr abeno. Partîya îqtîdarî tim û tim hêrişê destkewteyanê cinîyan kena. Nika zî seba ke heqanê cinîyan paweno hêrişê Pêkerdişê Îstanbulî kenê ke betal bikerê. Ma sey cinîyan do wayîrê nê pêkerdişî vejîyê ke paştî dano cinîyan. Ma do çirey têkoşînê cuya azade cameverdê. Ma do Pêkerdişê Îstanbulî ra peyser game meerzê. Ma tîya ra reyna veng danê ke wa cinîyî wayîrê serewedaritişê cinîyan vejîyê û îqtîdar zî herinda betalkerdişî de wa şertanê pêkerdişî bîyaro ca.''

Çalakîye bi tîlîlîyan û sloganan qedîyaye.