Badê şehadetê Îpeke Era ke seba ke hetê çawişê pîsporî yê tirkî Musa Orhanî ra ameye tecawuzkerdene, xo kişt, Vizêr xeylêk bajaranê Kurdîstan û Tirkîya de cinîyî vera polîtîkaya tecawuzî yê dewlete vejîyayî meydanan û bi vengê berzî qîrayî.

Qezaya Cizîre ya Şirnexî de bi tewrbîyayîşê Parlamentera HDPyî yê Şirnexî Nurane Îmîr û Hemsereka Pêroyî ya DBPyî Salîha Aydenîz çalakîyêke ameye organîzekrdene. Polîsan desturê eşkerayî nêda.  Nurane Îmer ard ziwan ke ê qedexeyê Walîtîye nas nêkenê û sey cinîyî do kuçeyan de bê. Hemsereka HDPyî yê Cizîre Gulere Tunç dest pê eşkerayîye kerde. Eşkerayîye de ame vatene ke na polîtîkaya leyşine newe nîya, bi serran o ke Kurdîstanî de yena rayraberdene la ê do verê naye bigerê. Aydenîze zî tecawuz û qikerdişî sey polîtîkya dewlete name kerdî û vat:  ''Wezîre dewlete paştî danê qetilker û tecawuzkeran. La heta qedînayîşê tecawuz û nê zîhnîyetê leyşinî do têkoşînê cinîyan dewam bikero.''

Mêrdîn  û Riha de zî serkeşîya TJA û Meclîsê Cinîyan ê HDPyî de cinîyî vera tecawuzî kuçeyan de bî. Çalakîyan de bale ameye ante ser ke tecawuzkerî hetê dewlete ra yenê pawitene û ame vatene ke kulturê tecwuzî şexsê cinîyan kurdan de sey sîstemkî vera cinîyan yeno rayraberdene. Ma do bi xurtkerdişê têkoşînî verê naye bîgerê.

Reyna Ankara, Îstanbul, Hatay, Mersin û xeylêk bajranê bînan de zî cinîyan bi çalakîyan polîtîkaya tecawuzî protesto kerde û mesajê xurtkerdişê têkoşînî dayî.