Endamanê Meclîsê Cinîyan ê Partîya Demokratîke ya Şaran (HDP) banê bajarî de eşkerayîyêke dayê û varê qanûnê înfazî yê yo ke îqtîdarê AKP-MHPyî pê  paştgêrê zîndanî ra vetî şermezar kerd. Metnê çapemenîyo ke derheqê babete ame amadekerdene hetê endama meclîsî Songul Bacadurmuş ra ame wendene. 

Eşkerayîye de nê ameyî parekerdene: ''Bado ke janê Korona Tirkîya de tesîrê xo ramojna waştişo komelkî vejîya ke werte ke wa tepişteyê ke zîndanan de binê rîke girdî de yê bêrê veradayene. La îqtîdarê AKP-MHPyî bi qanûnê înfazî  yo ke semedê tay humkwerdeyan yeno manaya efû û semedê tepişteyanê sîyasîyan sey îdamî yo ame vetene.

Muxalefeto komelkî bî zextî yeno cumkerdene. Hukm bîyo çuyeyê îqtîdarî. Parlamenterî û hemşaredarî zî tede bi hezaran sîyasetmedar, akademisyen, rojnameger û wendekarî bîlasebeb zîndan de yê. Tepişteyê ke bêhuqûq  rehîn yenê girewtene hetêkî ra zî heme heqê înan ameyî binpaykerdene û nêeşkenê nefes bîgirê. Caardişê sey Zînxanê Amedî yê serranê 80yan yenê kerdene. Bi qanûnê înfazî tepişteyê sîyasîyî mergî rê ameyî caverdayene bi cezayanê disîplînî  zereyê zîndanî de zîndan bîyo sey çîyêk normalî. Îqtîdarî bi nê qanûnî hêrişkar û tecawuzkarê vera cinîyan û qijan efû kerdî. Ewro ra tepîya berpirsîyarê şîdet û mergan wekîlê AKP-MHPyî yê ke înan nê qenûn tesdîq kerd.

Têkoşînê ma cinîyan vera nê dişmenê cinîyan, qijan û xoza û dostê çeteyan, hêrişkaran û mafyayan nêqîdîyayo. Ma do heta serkewtiş xoverdayîş rê dewam bikerê.''

Eşkerayîya cinîyan bi çepik û tîlîlîyan qedîyaye.

Reyna Amed, Wan, Mêrdîn, Şirnex, Dîlok, Meletî, Riha, Îstanbul, Îzmîr, Adana, Mersîn û xeylêk bajaranê bînan ê Kurdîstan û Tirkîya de qanûnê înfazî ame şermezarkerdene û semedê serbestveradayîşê tepişteyanê sîyasîyan ame vengdayene.