Verfeka Partîya Paştdarîye ya Afganî Selah Ghaffare, parlamentera kane û aktîvîsta sîyasîye Malala Joya û komîteya Mîyanneteweyî ya Yewîya Cinîyan ê Şorişgêran, bi nameyê “însîyatîfê mîyanneteweyî yê Seba Leyla Guvene“ xeylî sazîyan rê mektubî erşawitî. Sazîyê ke ci rê mektubî ameyê erşawitene wina yê: Konseya Ewropa, Komîsyonê Ewropa, Teşkîlatê Hemkarî û Ewlehî yê Ewropa û Komîteya Vergirewtişê Îşkenceyî.

Rêxistinanê cinîyan ê Afganî bale ante mucadeleyê Leyla Guvene yê demokrasîyî ser û wina va: “Leyla Guvene 8ê Teşrîna Peyêne ra nat grevê vêşanîye de ya û hetê weşîye ra resta merhaleyêka krîtîke. Komela mîyanneteweyîye ganî ney bivîno û bêveng nêmano. Ma sey Însîyatîfê Mîyanneteweyî yê Seba Leyla Guvene wazenîme ke sere de Konseya Ewropa, Komîsyonê Ewropa, Teşkîlatê Hemkarî û Ewlehî yê Ewropa û Komîteya Vergirewtişê Îşkenceyî, pêroyê Yewîya Ewropa ganî hem hetê hiqûq hem hetê sîyasî ra wezîfeyê xo bîyarê ca û vera rejimê Erdoganî tê bigêrê. Tirkîya de otorîterîye bena vila û ney sazîyan ra yew tedbîr nêgêno.“

Aktîvîstan nê qewemîyayîşî, bêvengîya CPT û AGÎTî ra girê dayî  û va ma Leyla Guvene fehm kenîme û paştdarîye danîme ci. Mektuba aktîvîstan de bale ancîyaye qesaya Leyla Guvene ya „Tecrîd, sucê merdimahîye yo“ ser û ame waştene ke wa welatê Ewropa, heqê merdimahî, heqê kultûrî, sosyal û sîyasîyan bipawo û seba haştîye tê bigêrê.

Mektube de wina ame vatene:“Mabênê Tirkîya û Ewropa de têkilîyê sîyasî, sazîyî, leşkerî û ekonomîkî estê. Netice de Ewropa ke biwazo eşkena Tirkîya ser tesîrêkê muhîmî bivirazo.“

Endamanê însîyatîfî waşt ke wa no derheq de tedbîrî bêrê girewtene û tecrîdo ke  Rayberê Şarê Kurdî Abdullah Ocalanî û girewteyan ser o yeno domnayene wedarîyo.