Cinîyan ê elewîyan serrgêra 83. ya Terteleyê Dêrsimî de Merkezê Pêroyî yê Komeleyanê Dekomratîkan ê Elewîyan (DAD) de merasîmê yadkerdişî serûber kerd. Xeylêk temsîlkarê partîyan û rêxistinan tewrê merasîmî bîyî. Merasîm de Sekretera DADî Nadîde Yalli qisey kerd.

Nadîde Yalli ard ziwan ke Terteleyê Dêrsimî de ciwanî, cinîyî, domanî, kokimî ameyî qirkerdene. Nadîde Yalli vat: ''Seke ma peyê kênayanê vînbîyayeyan ê Dêrsimî nêverdenê ma do peyê Gulîstane Doku zî nêverdê. Heta ke ma aye bivînê ma persenê ke Gulîstane Doku ha ça de ya. Na cografya de her înkar gorêko komkî yo. Çerayê ma do qet hewn a nêşorê. Wa delîlê ma seba kênayanê ma yê vînbîyayeyan, qurbananê ma yê bêkefenan û seba Ana Fatma bêrê tavistene.''

Reyna cinîyê ke endamê Komeleyanê Demokratîkan ê Elewîyan ê seba qurbananê Terteleyê Dêrsimî, seba Seyîd Rizayî saete 19:38î de çerayî tavistî.