Wesayîtanê hewayî yê çekdaran ê bêmerdiman (SÎHA) ê dewleta tirke 23ê hezîrane de dewa Helince ya Kobanê de hîrê cinîyê aktîvîstî hedef girewtî. Hêriş de Endama Koordînasyonê Kongreya Starî ya herêma Firatî Zehra Berkel û Hebûn Mela Xelil û wayîrê keyeyî Emîne Weysî ameybî qetilkerdene.

Zehra Berkel

Zehra Berkela ke 1987 de keyeyêko welatperwer ê Kobanê de ameye dinya Unîversîteya Helbebî de huqûq wend.  Berkela ke 2013 de tewrê xebaranê cinîya bîye Mala Jinan (Keyeyê cinîyan) de ca girewt. Dima ra Heyva Sor a Kurd û Meclîsê Şarî yê Kobanê de xebat rayra berd û bîye Hemsereka Meclîsê Şaredarîya Kobanê. Berkele badê hemşaredarîye Komîsyonê Edaletî rê hemserekîye kerd û tewr peynî de 2018 de sey Endama Koordînasyonê Kongreya Starî ya Herêma Firatî wezîfe girewt.

Emîne Weysî

Emîne Weysî ya ke 1965 dewa Hlincê de ameye dinya, wayrîê 5 tutan bî û nasnameyê xo yê welatperwerî ameyêne naskerdene. Weysîya ke tim çalakîyan de ca girewtêne heme enerjîya xo dayêne têkoşînê cinîyan ê kurdan.

Hebûne Mele Xelîl 

Hebûne Mele Xelîl  zî Endama Kongraya Star bî. Xelîle dewa dewa Pêndirî ya Kobanê ra bîye û tede nêweşîya kanserî estbî.