Batalkerdişê wekilîya wekîlanê HDPyî Leyla Guven û Musa Farisogullariyî hetê cinîyanê HDP û HDK û TJA ra ame şermezarkerdene.

Mersîn

Cinîyan waşt ke bînaya HDPyî ya Mersînî de derheqê babete de eşkerayîye bidê çapemenîye labelê polîsanê tirkan cinîyî asteng kerdî. Cinîyan israr kerd û korîdorê bînaya partîye de eşkerayîye daye. Hemsereka HDPyî ya Mersînî Gulbahare Şofer vist vîrî ke Wekîlê CHPyî Enîs Berberoglu vîrusê Korona ra vera dîya la wekîlê HDPyî vera nêdîyayî û no zî mojneno ke hêriş bi xo têna vera HDPyî yo.

Şofere vat: ''Ma nê nêzdîbîyayîşê faşîstî qebul nêkenê. Faşîzm têna meseleya HDPyî nîyo. Ya ma pêro pîya ci ra xelisîyenê yan zî ma çin benê.''

Îdir

Aktîvîstanê TJA û endamanê Meclîsê Cinîyan ê HDPyî yê Îdirî verê bînaya HDPyî ya Îdirî de eşkerayîye daye.

Ozleme Tozuk eşkerayîye wende û vat: ''Leyla Guven îradeyê cinîyan a. Qet yew îqtîdaro faşîst nêeşkeno ma têkoşînî ra biaçarno a. Ma do vera destsernayîşê îradeyê xo bêveng nêmanê.''