Cinîyê ke Paşt danê bextwaştoxan Şîşlî ya Stenbolî de ameyî têhet û qerarê peyserşawitişê bextwaştoxan protesto kerd. Cinîyanê ke kincê sîyayî dayê xo ra mesajê ‘’Pîya ciwîyayîşî’’ da.

Cinîyê ke xeylî fraksîyonan ra ameyî têhet bi Kurkî, Tirkî û Erebkî dovîzê ke sero ‘’Xo vîra nêkerê beno ke rojêk ma heme bextwaştox bê’’,  ‘’Heqê bextwaştoxî heqê merdimîye yo’’,  ‘’Ma do pîya biciwîyê’’ û  ‘’Vera  nîjadperestîye paştdayîşê bextwaştoxan’’ nuştebî akerdî.

Çalakîya ke binê ablûqaya polîsan de ameye viraştene de parlementera HDP’yî Zuleyha Gulume qisey kerd. Gulume vist vîrî ke çew biwaştiş welatê xo canêverdeno û va: ‘’Ê ke welatê xo ra rîyê şerî ra remayê welatanê bînan de raştê  nîjadperestîye yenê. No  tewirêkê merdimî nîyo. Ma wazenê bextwaştoxî tîya pîya bi ma şertanê merdîmî de biciwîyê. Bitaybetî cinîyî şer û bextwaştoxîye de senî şertanê giranan de ciwîyenê ma zaf hol zanê. Raştê tacîz, tecawuz û zextanê giran yenê û keda înan yena binpaykerdene. Ma tîya ra reyna semedê vindarnayişê polîtîkayanê peyser şawitişî veng danê. Heqê şima çîno ke şima bextwaştoxan goreyê polîtîkaya xo bişuxulnê.  Şima bextwaştoxan ser ra Ewropa tehdît kerd, nika karê şima qedîya coka peyser şawenê? Ma heta peynî paşt danê bextwaştoxan û bitaybetî zî kişta cinî û domanan de yê.’’ Dimayê qiseykerdişan cinîyan çalakîya bêvenge viraşte.