Tepişteyê sîyasîyî nê prosesê vîrusê Korona de zîndanan de yenê tepiştene. Seba ke cuye tepişteyanê sîyasîyan binê tehluke de yo rayberîya cinîyan ê kurdan de bi nameyê 'Paştdayîş Ma Dano Ciwîyayene' kampanyayêka paştdayîşî ameye destpêkerdene. 

Derheqê kampanya de Merkezê Komelê Demokratîkî yê Kurdan ê Kolnî de eşkerayîyêke  ameye dayene. Eşkerayîya çapemenîye de nameyê TEJK-E ser o hetê Besîme Konca ra bi kurmanckî, hetê Ronak Fadavî ra bi sorankî, hetê Yildize Fîlmcî ra bi tirkî û hetê Yvonne Heine ra zî bi almankî ameye wendene. Konca ard ziwan ke rêxistinê cinîyan ê Pakistan, Afganîstan, Amerîkaya Latîne, Îspanya û xeylêk têgêrayîşê cinîyan tewrê kampanya bîyî.

Konca îfade kerd ke seba azadîya pêro tepişteyan ê sîyasîyan ê ke semedê fikranê xo ra zîndan de yê înan dest pê kampanya kerd û çarçewa na kampanya de xebatanê cîyayî bikerê. Konca da zanayene ke seba ke dezgehanê sey Neteweyanê Yewbîyayeyan, Yewîya Ewropa û Komîteya Vergirewtişê Îşkenceyî reyde karê dîplomasîyî bikerê ê têgêrenê. Konca vat: ''Dewletê sey Tirkîya bi hawayêkê cîyakerî nêzdîyê meseleya tepişteyan ê sîyasîyan benê. Sûcdarî ameyî veradayene la tepişteyê sîyasîyî hema zî zîndan de yê. Ma do paştî bidê keyeyanê tepişteyan zî. Îran zî bi heman hewayî nêzdîyê tepişteyan ê kurdan beno.''

Dezgehê ke kampanya de ca girewt, nê yê: Free Women’s Movement (TJA), Kurdish Women’s Movement – Europe (TJK-E), International Women’s Alliance (IWA), Women Democratic Front Pakistan (WDF), Ruba odeh Palestine, Abya Yala Feminists, National Front for Egyptian Women, Moroccan Association for Progressive Women, Revolutionary Association of the Women of Afghanistan RAWA, Collective of Support for Women Prisoners in Aragon (C.A.M.P.A.)