Rojanê vîyarteyan de Heyetê Pêroyî yê Meclîsî de qanûnê înfazî pê reyanê wekîlanê AKP û MHPyî ame qebulkerdene. Pê tesdîqkerdişê qanûnî dest pê veradayîşê nêzdîyê 51 hezar tepişteyanê dizdan, cergan ame kerdene.

Hesabê twiterî yê HDPyî de pê taga ''Înfazî ra dima cinîyî binê tehlukeyî de yê'' dest pê çalakîye kerd. Xeylêk cinîyan zî paştî da çalakîye.

Wekîla HDPyî Fîlîze Kerestecîoglu hesabê xo yê twitterî de wina vat: ''Veradayîşî ra verî yeno ercnayene ke nê versûcî seba cinîyan do bibê rîsk yan nê? Înfazî ra dima cinîyî binê tehlukeyî de yê.''

Hemsereka KCDyî û Wekîla HDPyî Leyla Guven vat: ''Wexto ke herinda domanî de vanê cinîye zaf masum aseno nê? Hîşmendîye bi nê hawayî yena îdarekerdene. Înfazî ra dima cinîyî binê tehlukeyî de yê.''

Wekîla HDPyî Merale Daniş Beştaş: ''Ma 7 roj û şewan Meclîs de vat ke înfazî ra dima cinîyî binê tehlukeyî de yê. Sey her wextî ê reyna sey xo têgêrayî. Ma do pîya heqê na zehmetîye ra zî bêrê.''